Ardana esimdi arý qyz ushqysh bolýdy jasynan armandaǵan eken. Bala kezinde tehnıkalyq taqyryptaǵy jýrnaldardyń birinen kórgen «MıG-29» áskerı ushaǵynyń sýreti ásershil jastyń bolashaq taǵdyryna tikeleı áser etedi dep kim oılaǵan?..
Mektepti bitire salysymen alyp-ushyp armanyna qol sozǵan. Aqtóbedegi Talǵat Bıgeldınov atyndaǵy Áýe qorǵanysy kúshteriniń áskerı ınstıtýtyna qujat tapsyrdy. Biraq synaqtan óte almady. Namysty qyz Ardana alǵan betinen qaıtpaıtyndardyń sanatynan edi. Endi Alataýdy betke alyp, Almatydaǵy Azamattyq avıasııa akademııasyna oqýǵa túsýge bel býǵan.
«Talpynǵan jeter muratqa» degen bar emes pe, bul synaqtan sátti ótken ol stýdenttik dáýrendi artqa tastap, «Áýe kemeleri men qozǵaltqyshtardy ushýda paıdalaný» mamandyǵy boıynsha dıplom alyp shyqty. «Akademııany támamdaǵannan keıin mende 240 saǵattyq reıd boldy, deıdi ushqysh qyz. – Onyń 40 saǵatyn men Astana qalasynyń memlekettik avıasııalyq ortalyǵynda ushyp mashyqtandym. TL-2000, Tecnam P-2002, Diamond DA42 eki qozǵaltqyshty jeńil ushaqtardy baǵyndyrýdy meńgerdim».
Qazirgi tańda aǵa leıtenant Ardana Botaı – Qaraǵandynyń avıasııalyq bazasynda áskerı qyzmette júrgen jalǵyz qyz. Eskadrılıanyń aǵa ushqysh-joıǵysh laýazymyndaǵy ol er adamdarmen teń dárejede jumys isteıdi. Naqtyraq aıtqanda, Ardana «Sý-30SM» dep atalatyn jańa býyn joıǵysh ushaqtaryn tizgindep júr qazir.
Avıasııalyq eskadrılıa komandıri podpolkovnık Birimjan Tulypbaev Ardananyń ózin jaqsy ushý derekteri bar saýatty jáne jaýapty ushqysh retinde kórsete bilgenin maqtanyshpen aıtady. «Aspanda ushqyshtyń bári birdeı. Sol sebepti barlyq ushý quramyna qandaı talaptar qoıylsa, Ardana Botaıǵa da sonyń bári qatysty», deıdi komandır.
Al ushqysh qyz bolsa, kúnige zeńgir kókke samǵap ushyp, óziniń kásibı sheberligi men biliktiligin ushtaýdan jalyqqan emes.
QARAǴANDY