Agenttiktiń sheteldik seriktesteriniń jelisin keńeıtý maqsatynda Parasattylyq jáne sybaılas jemqorlyqqa qarsy is-qımyl komıssııasynyń (budan ári – komıssııa) basshylyǵymen jáne Iordanııanyń Qazaqstandaǵy elshisi Iýsýf Abdelganımen onlaın-kezdesý ótkizildi.
Sybaılas jemqorlyqqa qarsy vedomstvonyń basshysy Alık Shpekbaev ıordanııalyq áriptesterin jumys nátıjelerimen jáne elimizde júrgizilip jatqan keshendi reformalarmen tanystyryp, saıası jańǵyrtýdyń mańyzdylyǵyn atap ótti. Sondaı-aq, ol sybaılas jemqorlyq quqyq buzýshylyqtary úshin qylmystyq jaýapkershilikti kúsheıtýge jáne aldyn alýǵa baǵyttalǵan sybaılas jemqorlyqqa qarsy zańnamanyń novellalaryna nazar aýdardy.
Buǵan deıin óz hatynda komıssııa tóraǵasy Mýhannad Hıdjazı elimizdiń jetistikterin, halyqaralyq reıtıngterde aıtarlyqtaı ósýdi atap ótti. О́z kezeginde Elshi Iýsýf Abdelganı Qazaqstanda turyp, sybaılas jemqorlyqqa qarsy is-qımyldaǵy jaqsartýlar men eleýli jetistikterge kóz jetkizgenin atap ótti.
Iordanııa vedomstvosynyń bas hatshysy Asam Taraýne sybaılas jemqorlyqqa qarsy saıasattyń qalyptasý tarıhy týraly egjeı-tegjeıli aıtyp berdi. Onyń tarıhy 2005 jyly BUU-nyń Sybaılas jemqorlyqqa qarsy konvensııasyn ratıfıkasııalaýdan bastaý alyp, para berý ýádesin/usynysyn krımınalızasııalaý, yqpal etý saýdasy jáne aqshany jylystatý bóliginde pysyqtalyp jatqan bastamalarǵa deıin jalǵasady.
Eki memlekettik organnyń qyzmeti, fýnksııalary men basymdyqtary kóbine sáıkes keledi. Mysaly, Iordanııanyń sybaılas jemqorlyqqa qarsy is-qımyl Ulttyq josparynda kózdelgen jobalardyń 70%-y aldyn alýǵa baǵyttalǵan.
Kezdesý qorytyndysy boıynsha taraptar yntymaqtastyq týraly Memorandýmǵa qol qoıý jáne turaqty negizde ózara keńester uıymdastyrý týraly kelisti.