Nur-Sultan qalasynyń Tilderdi damytý jáne muraǵat isi basqarmasy basshysynyń mindetin atqarýshy Sáken Esirkep elordanyń birneshe mektebi men mádenıet uıymyna qazaq qaıratkerleriniń esimi berilgenin málimdedi, dep habarlaıdy Egemen.kz
Qazaq qaıratkerleriniń esimin berý týraly usynys 2021 jylǵy 13 qańtardaǵy Nur-Sultan qalasy Onomastıka komıssııasynyń otyrysynda maquldanǵan.
«Atap aıtqanda, №35 mektep-lıseıge kórnekti memleket jáne qoǵam qaıratkeri, alǵashqy qazaq elshileriniń biri, dıplomat Názir Tórequlovtyń, №49 orta mektepke – Alash qaıratkeri, ǵalym, dramatýrg, jazýshy, jýrnalıst Qoshke Kemeńgerulynyń, №51 mektep-gımnazııasyna – qazaq halqynyń birtýar kúresker perzenti Mustafa Shoqaıdyń, №53 mektep-lıseıge – Keńes odaǵynyń batyry, jazýshy, Ekinshi dúnıejúzilik soǵystyń dańqty jaýyngeri Baýyrjan Momyshulynyń, №64 orta mektepke – bıolog-ǵalym, mınerologııa ǵylymdarynyń doktory, professor Qanysh Sátbaevtyń, №67 gımnazııaǵa – qazaq ádebıetiniń kórnekti ókili, áıgili «Kóshpendiler» trılogııasy men «Altyn orda» eńbeginiń avtory Ilııas Esenberlınniń, al №74 mektep-gımnazııaǵa – aqıyq aqyn Muqaǵalaı Maqataevtyń esimin berý maquldandy», dedi spıker Nur-Sultan qalasy máslıhatynyń kezekten tys otyrysynda.
№78 mektep-gımnazııaǵa – memleket qaıratkeri, jazýshy, «Eńbek týy», «Eńbekshi qazaq», ıaǵnı búgingi «Egemen Qazaqstan» gazetiniń bas redaktory bolyp qyzmet etken Smaǵul Sádaqasovtyń, №90 gımnazııaǵa – jazýshy, Abaıtaný ǵylymynyń negizin qalaýshylardyń biri Qaıym Muhamedhanovtyń esimi beriledi.
«Sonymen birge Nur-Sultan qalasy ákimdiginiń «Nomad city hall» teatryn Nur-Sultan qalasy ákimdiginiń Ázirbaıjan Mámbetov atyndaǵy memlekettik drama jáne komedııa teatry dep qaıta ataý usynysy qoldaý tapty. Bul esimderdiń barlyǵy tıisti mekeme ujymdarynyń atynan jazylǵan jáne ǵalymdar men zııaly qaýymnan túsken ótinishterdi negizge ala otyryp qarastyryldy», dedi S. Esirkep.