Týra bir jyl buryn Jandarbek Bekshın Qazaqstanǵa koronavırýstyń qashan «keletinin» boljaǵan edi, dep habarlaıdy Egemen.kz
Qazaqstannyń sol kezdegi bas sanıtarlyq dárigeri Jandarbek Bekshınniń boljamy birden áleýmettik jelilerde tarap, memge aınalyp, ásirese, «nakones-to» degen sózi kópshiliktiń qyzý talqysyna túsken edi.
Ol byltyr ótken OKQ brıfıngisinde: «Bizdiń boljamymyz boıynsha shamamen 11-16 naýryz aralyǵynda elimizde koronavırýs taralady. Biraq bul boljam. Bizde koronavırýs paıda bola salysymen birden arnaıy sharalar qabyldaıtyn bolamyz», dep jaýap berdi.
Osy tusta Jandarbek Bekshınniń boljamy rastalyp, elimizde 13 naýryz kúni alǵash ret koronavırýs juqtyrǵan jandar tirkeldi. Juqtyrǵandardyń eń alǵashqylary Germanııadan ushyp kelgen áıel men er adam boldy.
Dál osy málimdeden keıin kóp uzamaı bas sanıtar qyzmetinen bosatyldy. Dese de, ýaqyt óte kele, ol Almaty qalasynyń bas sanıtarlyq dárigeri bolyp taǵaıyndaldy.
Eske sala keteıik, elde qaýipti indet jappaı taralyp, qatań karantındik sharalar qabyldandy. Aldyn alý maqsatynda respýblıka kóleminde tótenshe jaıdaı rejimi engizildi. Barlyq aımaqta blok-beketter qoıylyp, emin-erkin júrýge tyıym salynǵan edi.
Aıta keterligi, qazirgi Qazaqstannyń sanıtarlyq-epıdemııalyq ahýaly turaqtaldy. Osy oraıda Úkimet tıisti sharalardy dereý qabyldap jatyr. Elde beıdaýa keselge qarsy vaksınany 1 aqpannan bastap egý qolǵa alyndy.