Bilim jáne ǵylym mınıstrligi mýzyka mektepteriniń jekemenshikke ótýin qoldamaıdy. Bul týraly atalǵan mınıstrliktiń baspasóz qyzmeti habarlama taratty, dep habarlaıdy Egemen.kz.
«Bilim jáne ǵylym mınıstrligi mýzyka mektepteriniń jekemenshikke ótýin qoldamaıdy. Ol uıymdarda balalar qosymsha bilim alyp jatyr. Sondyqtan shyǵarmashylyq baǵytyndaǵy úıirmege balalaryn qatystyryp jatqan ata-analar men sonda jumys isteıtin pedagogterdiń bul másele tóńiregindegi alańdaýshylyǵyn túsinýge bolady. Kerisinshe, jumys istep turǵan memlekettik qosymsha bilim berý uıymdaryn damytý qajet», delingen mınıstrlik habarlamasynda.
Sondaı-aq habarlamada memlekettik-jekemenshik áriptestik qaǵıdasy boıynsha qosymsha jańa obektilerdi salý jáne iske qosý maqsatynda bıznes ókilderin tartý qajettigi aıtylǵan.
«Bıyl «Bilim týraly» zańǵa túzetýler engizilgen bolatyn, sonyń negizinde ákimdikter balalardyń jekemenshik qosymsha bilim berý ortalyqtarynda úıirmeler men seksııalarǵa qatysa alýy úshin memlekettik tapsyrys arqyly jaǵdaı jasaı alady», delingen habarlamada.