Premer-Mınıstr Asqar Mamınniń tóraǵalyǵymen ótken Úkimet otyrysynda ındýstrııa jáne ınfraqurylymdyq damý mınıstri Beıbit Atamqulov ónerkásiptegi jaǵdaı týraly baıandama jasady. Osy jyldyń 2 aıynyń qorytyndysy boıynsha óńdeý ónerkásibi sektorlarynda 106,1% jıyntyq kórsetkishpen oń úrdis baıqalady, dep habarlaıdy Egemen.kz.
«Mashına jasaý salasynda 121,2% ósim boldy. Avtokólik quraldary, treılerler jáne ashyq tirkemeler, mashınalar men jabdyqtar óndirisi, ózge de kólik quraldary, kompıýterler, elektrondyq jáne optıkalyq jabdyqtar, elektr jabdyqtaryn jasaý, jóndeý jáne ornatý kólemi artty», — dedi mınıstr B. Atamqulov.
Sondaı-aq, onyń aıtýynsha, tústi metallýrgııada da oń dınamıka saqtalyp, ósim 5,4% boldy. Oǵan tazartylǵan altyn, tazartylǵan kúmis, quıma altyn, túıirshikterdegi kúmis, katodty mystyń jáne basqa da kórsetkishterdiń ósimi esebinen qol jetkizildi.
Qara metallýrgııada naqty kólem ındeksi 100,1% qurady. Shoıyn, ferro-sılıko-marganes óndirisi ósti. Farmasevtıka ónerkásibinde óndiris kólemi 9,2% artty. Shyǵarylatyn ónim kólemi «Hımfarm» aksıonerlik qoǵamynda 3 ese jáne «Nobel Almaty farmasevtıkalyq fabrıkasynda» 27% ulǵaıdy. Saladaǵy ósim negizinen halyqtyń dárilik zattar men medısınalyq buıymdarǵa degen suranysynyń artýy esebinen boldy. Jeńil ónerkásipte óndiris 3,5% ósti. Oǵan kıimniń jáne bylǵary ónimderdiń ulǵaıýy áser etti.
Dezınfeksııalyq quraldar men mıneraldyq tyńaıtqyshtarǵa suranystyń artýy hımııa ónerkásibiniń óndiris kólemin arttyrdy. О́sim 14,1% qurady. Qurylys materıaldary óndirisi 122,9% boldy. Oǵan portland-sement, gıps óndirisiniń artýy esebinen qol jetkizildi.
Sonymen qatar B. Atamqulovtyń aıtýynsha, tranzıttik konteınerlik tasymalda oń dınamıka saqtaldy. Kórsetkish 156,5 myń jıyrma fýnttyq balamany qurady. О́sim 79% boldy. Kóliktiń barlyq túrimen júk tasymaldaý kólemi 0,55 mlrd tonna nemese ótken jyldyń sáıkes kezeńimen salystyrǵanda 96,5% qurady.
«Qurylys salasynda naqty kólem ındeksi 2021 jyldyń qańtar-aqpan aılarynda 109,7% boldy. 15 óńirde oń kórsetkish tirkeldi», — dedi QR IIDM mınıstri.
Sondaı-aq turǵyn úı qurylysynda bıylǵy eki aıda 1 893 myń sharshy metr baspana paıdalanýǵa berildi. Iаǵnı, 2020 jyldyń sáıkes kezeńimen salystyrǵanda 112,8% qurady. Respýblıka boıynsha barlyǵy 15 807 baspana paıdalanýǵa berildi. О́tken jylmen salystyrǵanda bul kórsetkish barlyq óńirde artty. Jalpy bıyl elimizde 17 mln sharshy metr turǵyn úı salynady.