Búgin Úkimet otyrysynda Densaýlyq saqtaý mınıstri Alekseı Soı koronavırýs ınfeksııasynan bólek, ózge de juqpaly aýrýlar boıynsha elimizdegi epıdemıologııalyq jaǵdaı jaıly baıandady, dep habarlaıdy Egemen.kz mınıstrliktiń baspasóz qyzmetine silteme jasap.
A.Soıdyń aıtýynsha, koronavırýs ınfeksııasyn qospaǵanda, jalpy Qazaqstanda juqpaly aýrýlarǵa qatysy epıdemıologııalyq ahýal turaqty. Mınıstrlik 64 ınfeksııalyq aýrý boıynsha monıtorıng júrgizýde, 2020 jyldyń qorytyndysyna sáıkes 42 ınfeksııa boıynsha naýqas sany azaıdy.
«Bıyl oba, tyrysqaq, ish súzegi, qutyrý, týlıaremııa, kýongo-qyrym gemorragııalyq qyzbasy, dıfterııa, sirespe, qyzamyq, qyzylsha, sibir jarasy, bezgek aýrýlary tirkelgen joq», dedi A.Soı.
О́tken jyldyń osy kezeńimen salystyrǵanda 45 ınfeksııalyq aýrý, onyń ishinde kókjótel (22 ese), botýlızm (6,5 ese), menıngokokk ınfeksııasy (6 ese), vırýstyq gepatıt (4,7 ese), bakterııalyq dızenterııa (2 ese), brýsellez (49%), týberkýlez (25%) boıynsha syrqattanǵandar sany azaıǵan.
Sonymen qatar, Qazaqstan aýmaǵynda oba, týlıaremııa, gemorragııalyq qyzba (KQGQ, BSGQ), kúıdirgi jáne basqa da zoonozdyq ınfeksııalardyń tabıǵı oshaǵy bar. Elimizde asa qaýipti juqpaly aýrýlar tabıǵı oshaǵynyń aýmaǵy aıtarlyqtaı aýqymdy. Ońtústik óńirlerde kongo-qyrym gemorragııalyq qyzbaǵa shaldyqqandar qatary bir deńgeıde qalyp otyr.
«KQGQ qatyty epıdemııalyq maýsym qarsańynda jáne ońtústik óńirlerde kún jyly bolatynyn eskerip, ákimdikter aýrýlardyń aldyn alýǵa arnalǵan sharalarǵa asa muqııat qaraýy tıis», dedi A.Soı.
Buǵan deıingi tájirıbeni eskere otyryp, MSAK, jedel medısınalyq járdem qyzmetkerleriniń jáne basqa da beıindi mamandardyń KQGQ-ny erte anyqtaý, dıagnostıkalaý jáne epıdanamnez jınaý boıynsha daıyndyǵyn arttyrý qajet.