Temirtaý qalasyndaǵy ekologııalyq jaǵdaıǵa baılanysty Ekologııa, geologııa jáne tabıǵı resýrstar vıse-mınıstri Erlan Nysanbaev «ArselorMıttal Temirtaý» AQ ókilderimen kezdesip, shahardyń aınalasynda jasyl beldeý qurýǵa kelisti.
«Temirtaý qalasynda qalyptasqan ekologııalyq jaǵdaı jedel sharalar qabyldaýdy talap etedi. Bıyl jańa Ekologııalyq kodeks qabyldandy, sondaı-aq byltyr óńirdegi ahýaldy jaqsartý jónindegi Jol kartasy bekitildi. Bul is-sharalardyń barlyǵy osy baǵytta tıimdi kórsetkishterge qol jetkizýge múmkindik beredi. Temirtaý aınalasynda jasyl beldeý qurý pármendi shara bolatynyna senimdimin», dedi E.Nysanbaev.
Vıse-mınıstrdiń aıtýynsha, jaýapty vedomstvonyń jasyl beldeýdi qurýda tájirıbesi bar. Aıtalyq, 1997 jyly elordanyń aınalasynda jasyl beldeýdi qalyptastyrý jumysy qolǵa alynyp, qazir otyrǵyzylǵan aǵashtyń jalpy kólemi 87 myń gektar jerdi alyp jatyr.
«Nur-Sultan qalasynyń jasyl aımaǵyn qurý kezinde jınaqtalǵan tájirıbe Temirtaýdyń tóńiregin jasyl jelekpen kómkerý barysynda da qoldanylady», dedi vıse-mınıstr.
Qazaq orman sharýashylyǵy ǵylymı-zertteý ınstıtýty men «Qazgıproleshoz-KZ» jobalaý ınstıtýtynyń basshylary jasyl alqapty qalyptastyrýdaǵy tájirıbelerimen bólisip, ony qurý uzaq ýaqytty, sondaı-aq úlken qarajatty talap etetinin túsindirdi.
«Aǵash otyrǵyzyp, onyń jersinýine topyraq taldaýyn júrgizý qajet. Osydan keıin jer jyrtýdy bastaýǵa bolady. Bul jumystar eki jyldan astam ýaqytty alady. Sodan keıin ǵana aǵash otyrǵyzýǵa kirisýge bolady», dedi sarapshylar.
«ArselorMıttal Temirtaý» kompanııasynyń basshylyǵy óz kezeginde jobany qoldaýǵa jáne 500 myń aǵash otyrǵyzýǵa daıyn ekenderin jetkizdi.