Memleket basshysy Qasym-Jomart Toqaevtyń tapsyrmasymen ótken jyly respýblıka kóleminde alǵash ret Jambyl oblysynda «Beıbitshilik pen kelisim» jobasy qolǵa alynǵan bolatyn. Atalǵan joba óńirde naýryz aıynan qaıtadan bastaý alyp, «Etnos jáne konfessııaaralyq kelisim», «Áleýmettik-turmystyq máselelerdi sheshý jáne bıznesti damytý» men «Quqyq qorǵaý salasy» toby quryldy.
Jobanyń jumysshy toptarynyń negizgi maqsaty – oblys turǵyndarynyń ál-aýqatyn arttyrý, bilim berý men medısınalyq qyzmetter sapasyn jaqsartý, oblys jurtshylyǵynyń dinı bilim deńgeıin kóterý, azamattarǵa arnalǵan jyljymaly qabyldaý ótkizý, áleýmettik máselelerin sheshý bolyp otyr. Sondaı-aq, bos jumys oryndarynyń jármeńkelerin uıymdastyrý, halyqqa nesıe berý boıynsha keńes berý, halyqtyń áleýmettik osal toptarynyń máselelerin sheshý, zań aıasynda kómektesý, bıznesti qoldaý jáne damytý boıynsha júzege asyrylyp jatqan jobalar men memlekettik baǵdarlamalar týraly aqparattandyrý jumystaryn júrgizý sııaqty jumystar da bar. «Beıbitshilik pen kelisim» jobasy ótken jyly nátıjeli aıaqtaldy. Al, aǵymdaǵy jyly atalǵan joba óńirdiń Merki, Shý, Baızaq jáne Jambyl aýdandarynda jemisti bastalyp, oblystyq ishki saıasat basqarmasynyń qoldaýymen barlyǵy 430 is-shara uıymdastyryldy. Jobaǵa 10 myń 400 adam tartyldy. Aýdandarda 72 qoǵamdyq qabyldaý men 110 kezdesý ótip, 600-ge jýyq azamattyń máselesin sheshýge kómek berildi. Sonymen qatar, 250-den astam azamatqa medısınalyq kómek kórsetilip, 150-ge jýyq turǵynnyń qaıtarymsyz grant alý máselesi sheshildi. 241 adam turaqty jumysqa ornalassa, 29 jas jastar tájirıbesine joldama aldy.
Quqyq qorǵaý salasy tobynyń músheleri 367 adam qamtý arqyly 18 is-shara ótkizip, 89 adamǵa zańnamalyq keńes bergen. Jobanyń jumys toby quramyna oblys aýmaǵyndaǵy barlyq quqyq qorǵaý jáne memlekettik organdarmen qatar basqarmalardyń mamandary engizilgen. Osy maqsattaǵy jumystar endi naýryz aıynyń sońyna deıin Talas, Sarysý jáne Qordaı aýdandarynda ótetin bolady. Atalǵan aýdandardyń turǵyndary túıindi máseleleri men kókeıde júrgen suraqtaryn uıymdastyrylatyn jobanyń jumysshy tobymen kezdesip, nazarlaryna jetkizýge múmkindikteri bar. Joba jumysyn aıaqtaǵan soń turǵyndar tarapynan kóterilgen máseleler boıynsha jol kartasy jasaqtalyp, oryndalýy baqylaýǵa alynady.