Memleket basshysy Qasym-Jomart Toqaevtyń Jarlyǵyna sáıkes, elimizde pedagogtarǵa arnalǵan «Qazaqstannyń eńbek sińirgen ustazy» memlekettik nagradasy taǵaıyndaldy, dep habarlaıdy Egemen.kz
Bul qurmetti ataq pedagogıkalyq úzdik jetistikteri jáne elimizdiń bilim salasyna sińirgen aıryqsha eńbegi úshin Jambyl oblysynan Aıgúl Qalmahanova men Mırash Begildaevaǵa berildi. Aıta ketý kerek, el tarıhynda mundaı marapatpen pedagogtar alǵash ret marapattalýda. Atalǵan memlekettik nagradany ustazdarǵa elimizdiń Bilim jáne ǵylym mınıstri Ashat Aımaǵambetov tabys etti.
«Qazaqstannyń eńbek sińirgen ustazy» atanyp otyrǵan Aıgúl Qalmahanova Jambyl aýdanyndaǵy B.Besbaev atyndaǵy mektep-gımnazııanyń orys tili men ádebıeti pániniń muǵalimi bolyp jumys isteıdi. Ol «Úzdik pedagog-2019» respýblıkalyq baıqaýynyń jeńimpazy bolǵan jáne «Álem pedagogy» baıqaýyna iriktelgen 10 muǵalimniń qataryna engen. Al, qurmetti ataqqa qol jetkizip otyrǵan Mırash Begildaeva Jambyl oblystyq daryndy balalarǵa arnalǵan mamandandyrylǵan «Daryn» mektep-ınternatynda tarıh pániniń muǵalimi bolyp eńbek etedi. Birqatar halyqaralyq, respýblıkalyq baıqaýlardyń jeńimpazy. Shákirtteri ulttyq biryńǵaı testileý synynan jyl saıyn joǵary nátıje kórsetip keledi.