Aqtaýda Turar Joldybaevty eske alýǵa arnalǵan dzıýdodan erler men áıelder arasyndaǵy ashyq Azııa kýbogy aıaqtaldy. Áskerı ortalyq sport klýbynyń nusqaýshy sportshylary týrnırde ártúrli dárejedegi úsh medaldy qanjyǵalaryna baılady, dep habarlaıdy Egemen.kz Qorǵanys mınıstrliginiń baspasóz qyzmetine silteme jasap.
Jalpy alǵanda jarysqa Avstralııa, Qazaqstan, Qyrǵyzstan, Reseı, Tájikstan jáne О́zbekstan elderinen 198 sportshy qatysty.
Jarys qorytyndysy boıynsha 100 keliden astam salmaq dárejesinde armııa sportshysy efreıtor Erasyl Qajybaev chempıon atandy. Aqtyq synda ol «Qazaqstan Barysy – 2017» tıtýlynyń ıegeri, otandasy Elaman Erǵalıevti jeńdi. 60 kelige deıingi salmaq dárejesinde OSK sport rotasynyń merzimdi qyzmet áskerı qyzmetshisi qatardaǵy jaýynger Dáýren Sıýkenov kúmis medalǵa ıe boldy. 100 keliden joǵary salmaq dárejesinde efreıtor Ádil Orazbaev qola júldegeri atandy.
«Men jattyqtyrýshylarymnyń, áriptesterimniń jáne dostarymnyń senimin aqtaǵanyma óte qýanyshtymyn. Tálimgerlerdiń barlyq tapsyrmalaryn oryndap, «altyn» jeńip aldym. 19 naýryzda áskerı qyzmetshiler arasynda ótetin «Ásker barysy – 2021» tıtýlyna irikteý týrnırinde Qarýly Kúshterdiń namysyn qorǵaýǵa tyrysamyn», dep bólisti áskerı sportshy efreıtor Erasyl Qajybaev.
Turar Joldybaevty eske alýǵa arnalǵan dzıýdodan ashyq Azııa Kýbogy lısenzııalanǵan týrnır bolyp tabylatynyn aıta ketý kerek. IJF erejeleri boıynsha týrnır chempıondary men júldegerleri Halyqaralyq dzıýdo federasııasynyń reıtıngi esebine upaı alady: birinshi oryn – 100 upaı, ekinshi oryn – 60 upaı jáne úshinshi oryn – 40 upaı.