Uly dalada jaryq dúnıe esigin ashyp, Uly dalada nebir yqylym zamannan beri ult bolyp, el bolyp qalyptasqan halqymyz tabıǵattyń árbir qubylysynyń qabaǵyna qarap, dúleıimen alysyp, kúngeıimen qýana qaýyshyp kún keshken. Iаǵnı tabıǵattyń tól perzenti bolǵan. Aspandaǵy Kúnniń de, astyndaǵy Jerdiń de qadirin bilgen.
Jaratýshynyń adam balasyna bergen osynaý nyǵmetterin qut, bereke dep bilgen. Ony únemdep shashpaı tókpeı keregine jaratqan. Jaratýshynyń sý, aýa, jer, ósimdik, mal tárizdi nyǵmetterin aıalaı bilgen. Uly Jaratýshy adam peshenesine jazǵan osynaý nyǵmetterdi saqtaýdyń, molaıtýdyń qyr-syryna qanyqqan. Qyzyǵyn kórgen.
Halqymyz erteden-aq Jaratýshy syıǵa bergen bul baılyqtarmen qarym-qatynas jasaı bilgen. Aýa, sý, jer, tórt túlikti sondyqtan da aıalaǵan. Osynaý tabıǵat syıyn aıalaı bilgende ǵana armansyz kún keshetinin uqqan. Bulardy kıe tutqan. Ol baılyqtardy ysyraptamaǵan. Kerisinshe kóbeıtken. Sol mol baılyqtyń biri sý edi. Sýsyz ómir tul edi. Sý jańbyr bolyp jaýady. Bulaq bolyp aǵady. Topyraq ony ishedi. Odan órgen ósimdikti mal jeıdi. Maldy adam jeıdi. Onsyz ómir toqtaıdy. Sony túıgen dalalyqtar jer, sý, aýa, ósimdik, maldy, jylýdy kıe tutty. Adam adam bolý úshin olardyń kózin ashty. Kóbeıtti. Jer-Ana bizdi bulaǵymen emizedi. Sol bulaqtyń kózin ashý ár pendeniń mindeti. Ásirese, búgingideı Ulystyń uly kúni – Naýryz kúnderi dalalyqtar tabıǵat – ana sútindeı sý kózin ashýdy urpaǵyna úlgi etken. Bir bulaqtyń kózin ashsań ómir atty myń bulaq saltanat qurmaq. Kósegesi kógerip tirlik búrshik atpaq. Sen qadaǵan tal shybyq kúni erteń búrshik atyp máýelemek. Igilikke aınalmaq.
Dana halqymyz sondyqtan kóktem kele bulaq kózin ashqan. Jylý men jer, sý tirlik bastaýy dep bilgen. Tirlik kózi ashylsa, ómir kóshi toqtamaǵan. Sol salttyń arqasynda halyq bar bolǵan. Biz bar bolǵanbyz. Endeshe, ylǵı da bar bolaıyq!
Smaǵul ELÝBAEV,
jazýshy