Búgin Senatta Palata Tóraǵasy Máýlen Áshimbaev pen ekologııa, geologııa jáne tabıǵı resýrstar mınıstri Maǵzum Myrzaǵalıevtiń qatysýymen ótken Jas sarapshylar klýbynyń otyrysynda osyndaı bastama jarııa etildi, dep habarlaıdy Egemen.kz
Otyrys ekologııa, tabıǵı resýrstardy utymdy paıdalaný jáne ornyqty damý máselelerine arnalǵan bolatyn. Senat Tóraǵasy sharany asha kelip, ekologııalyq problemalardy jurtshylyqtyń belsendi qatysýymen sheshýge bolatynyn atap ótti.
«Ekologııalyq problemalardy memlekettiń qatysýymen ǵana sheshý múmkin emes ekeni anyq. Azamattyq sektor, ÚEU, bıznes, janashyr jandar men eriktiler tarapynan da belsendi is-qımyl qajet bolady. Halyq arasynda ekologııalyq oılaý men qorshaǵan ortaǵa jaýapkershilikti damytý qajet», dep atap ótti Senat Tóraǵasy.
Ál-Farabı atyndaǵy QazUÝ-dyń ekolog-zertteýshisi, ǵylym jáne tehnologııalar salasyndaǵy PhD, BUU-nyń Klımattyń ózgerýi jónindegi hatshylyǵynyń sarapshy-resenzenti Aıymgúl Kerimraı elimizdegi ekologııalyq máselelerdi sheshýge azamattardyń belsendi qatysýy úshin aýada lastaýshy zattardyń konsentrasııasy joǵary ekendigi týraly halyqty jedel habardar etý júıesin qurýdy usyndy.
«Aýa sapasy týraly aqparat jańalyqtar saıttary men telearnalarda kún saıyn kópshilikke qol jetimdi bolýy kerek. Aýanyń sapasy týraly aqparat kóptegen elderde aýa raıy boljamymen birge beriledi. Aýa-raıynyń qaýipti jaǵdaıy týraly habarlaıtyn SMS-habarlama sııaqty aýanyń lastaný deńgeıi joǵary bolǵanda da aqparat berilýi kerek», dedi sarapshy.
Aıymgúl Kerimraı sonymen qatar elimizde lastaýshy zattardyń ruqsat etilgen konsentrasııasynyń qabyldanǵan shegi eskirgenin jáne halyqaralyq deńgeıden ózgeshe dep sanaıdy. Al memlekettik organdar sheshim qabyldaý kezinde aýa sapasynyń jaı-kúıi týraly derekterdi tıisti dárejede paıdalanbaı keledi.