Almatyda ushaq apatynan aýyr jaraqat alǵan eki adam esin jıdy. Bul týraly qalalyq №4 klınıkalyq aýrýhanasynyń bas dárigeri Saǵı Beısenbekov habarlady.
«Almatyda ushaq apatynan zardap shekken eki azamattyń jaǵdaıy aýyr, biraq turaqty. Reanımasııa jaǵdaıynda baqylaýda. Ekeýi de esin jıdy», deıdi Saǵı Beısenbekov.
Esterińizge sala keteıik, 13 naýryz kúni Nur-Sultan qalasynan ushyp shyqqan AN-26 áskerı ushaǵy Almaty áýejaıynyń ushý-qoný jolaǵyna jetpeı apatqa ushyrap, órtke oranǵan bolatyn. Borttaǵy 4 adam oqıǵa ornynda qaza bolsa, eki azamat aýyr hálde aýrýhanaǵa jetkizilgen edi.