On jyldan jıyrma jylǵa deıin eńbek ótili bar 300-den astam áskerı qyzmetshi Qazaqstannyń túrli óńirlerinde jyljymaıtyn múliktiń menshik ıesi bola otyryp, qyzmettik turǵyn úıdi aıyrbastaý tetigin paıdalandy, dep habarlaıdy Egemen.kz Qorǵanys mınıstrliginiń baspasóz qyzmetine silteme jasap.
Qoldanystaǵy zańnamaǵa sáıkes áskerı qyzmette kúntizbelik eseppen keminde jıyrma jyl qyzmet etip bosatylǵan áskerı qyzmetshilerdiń turǵyn úıdi jekeshelendirýge nemese aqshalaı ótemaqy alýǵa quqyǵy bar.
Sonymen qatar osy merzimnen az qyzmet etken áskerı qyzmetshiler de bar. Olardyń turǵyn úıdi jekeshelendirý ornyna aqshalaı ótemaqy alýǵa quqyǵy joq, sonymen qatar ony óteýsiz negizde ala almaıdy. Zań boıynsha áskerı qalashyqtyń aýmaǵynda ornalasqan qyzmettik páterdi jekeshelendirýge bolmaıdy.
Turǵyn úı zańnamasyna engizilgen túzetýler jumystan shyǵarylǵan adamdarǵa qyzmettik turǵyn úıdi ári qaraı jekeshelendirý arqyly, memlekettik turǵyn úı qorynan basqa turǵyn úıge aıyrbastaýǵa múmkindik beredi.
- Qorǵanys mınıstrliginiń balansynda Nur-Sultan, Almaty jáne basqa qalalarda 236 páter bar. Bul zań qyzmet merzimi jetkiliksiz burynǵy áskerı qyzmetshilerge turǵyn úıdi aýystyrý quqyǵyn paıdalanýǵa múmkindik beredi. Siz páterdi qaldyq quny boıynsha satyp ala alasyz. Bastapqy tólem retinde 30% salym, al qalǵan somany on jylǵa paıyzsyz bólip tóleý qarastyrylǵan, – dep túsindirdi Áskerlerdi páterlerge ornalastyrý bas basqarmasynyń aǵa ofıseri ádilet maıory Dáýrenbek Jumabek.
Máselen, Nur-Sultan qalasynda qaldyq quny úsh mıllıonnan jeti mıllıon teńgege deıingi 34 páter aıyrbastaýǵa usynyldy. Mysaly, aýdany 31,5 sharshy metr, quny 3 mln 300 myń teńgeni quraıtyn bir bólmeli páterdi satyp alý úshin bastapqy jarna retinde 990 myń teńge tóleý qajet. Qalǵan 2 mln 310 myń teńge on jyl ishinde tólenedi. Aı saıynǵy tólem 19 250 teńgeni quraıdy.
Qazirgi ýaqytta júzdegen adam osy mehanızm arqyly turǵyn úı satyp alýdyń joldary men múmkindikterin qarastyrýda. Bul rette Semeı polıgonyndaǵy ıadrolyq synaqtardyń saldarynan zardap shekken degen mártebe berilgen adamdar osy aýystyrýdan keıin páterlerin aqysyz menshigine aınaldyra alady.
Almaty oblysyna qarasty Jetigen aýylynda qyzmet etken jáne áskerı qalashyqta turǵan zapastaǵy kishi serjant Baqtygúl Sydyqova Nur-Sultan qalasynda bir bólmeli páterge ıe boldy. Búginde ol – elorda turǵyny.
– Zańǵa engizilgen ózgeristerden keıin aýdandyq paıdalaný bóliminiń ókilderi maǵan tolyq túsinikteme berdi. Aýystyrýǵa qatysty barlyq máseleler jedel jasaldy. Meniń jeke páterim, basymda baspanam baryna qýanyshtymyn, – dep Baqtygúl Sydyqova jaǵymdy jańalyqpen bólisti.
Qarýly Kúshterdiń Áskerlerdi páterlerge ornalastyrý bas basqarmasy áskerı qalashyqtardaǵy turǵyn úılerdi respýblıkanyń basqa óńirlerinen páterlerge aıyrbastaý jóninde túsindirý jumystaryn jalǵastyrýda. Vedomstvonyń turǵyn úı qory týraly barlyq aqparat Qorǵanys mınıstrliginiń resmı saıtyndaǵy «Turǵyn úımen qamtamasyz etý» bóliminde ornalastyrylǵan.