19 jasar almatylyq azamatshanyń ólimi jaıly jan túrshigerlik aıǵaqtar tabyldy, dep habarlaıdy Egemen.kz.
Bul týraly Almaty qalalyq polısııa departamenti bastyǵynyń orynbasary Rýstam Abdrahmanov málimdedi.
Onyń aıtýynsha, qyz kúdiktimen 16 naýryzda tanysqan. 20 naýryzda 102 nómirine Aıajan Edilovanyń joǵalǵany týraly habarlama keledi. 21 naýryzda arnaıy jedel top qurylyp, sotqa deıingi tergeý bastaldy.
Belgili bolǵandaı, boıjetken 19 naýryzdan 20 naýryzǵa qaraǵan túni óltirilgen. Onyń denesi bólshektelgen kúıinde tabyldy. Kúdikti deneniń bir bóligin Alataý aýdanynan tys jaqtaǵy qoqysqa tastaǵan. Ol óz áreketin qylmystyń izderin jasyrýǵa tyrysqandyǵymen túsindiredi. Kúdikti óz kinásin tolyǵymen moıyndady.
Eske sala keteıik, 19 naýryzda Almatyda 19 jastaǵy Aıajan Edilova joǵalyp ketti. 22 naýryzda onyń denesi tabyldy. Polısııa «Adam óltirý» baby boıynsha tergeý bastady, bul is boıynsha Túrkistan oblysynyń 1993 jyly týylǵan turǵyny ustaldy.
Polısııanyń habarlaýynsha, joǵalyp ketken kúni boıjetken áleýmettik jeli arqyly tanysqan jańa dosymen kezdesýge ketken. Marqum Aıajannyń týystary onyń erekshe qatygezdikpen óltirilgenin aıtyp otyr. Ázirge boıjetken kúdiktiniń jalǵyz qurbany bolmaýy múmkin degen kúdik bar.