2021 jyldyń alǵashqy eki aıynyń ózinde elimizde 1 mln 893 myń sharshy metrden astam turǵyn úı paıdalanýǵa berilgen. Bul – 2020 jyldyń dál osy kezeńimen salystyrǵanda 12,8 paıyzǵa joǵary kórsetkish.
Indýstrııa jáne ınfraqurylymdyq damý mınıstrliginiń málimeti boıynsha, alǵashqy eki aıda respýblıkada barlyǵy 15 807 turǵyn úı salynyp bitip, turǵyndar ıgiligine usynylǵan. Sonyń 5 487-si jeke úıler eken. Qańtar-aqpan aılarynyń qorytyndysy boıynsha turǵyn úıdi paıdalaný turǵysynan barlyq oblysta ósim baıqalady. Kórsetkish Atyraýda – 225,7, Qostanaıda – 123,5, Pavlodarda – 119,3, Aqtóbede – 118,7, Mańǵystaýda – 114,1, Qaraǵandyda – 113,6, Batys Qazaqstanda – 112,6, Atyraýda – 112,4, Soltústik Qazaqstanda – 111,4, Aqmolada – 110,6, Shyǵys Qazaqstanda – 107,9, Jambylda – 102,8, Qyzylordada – 101,9, Almatyda – 101,6, Túrkistanda – 101,5 paıyzǵa ósken.
Sonymen qatar Shymkent (456,5), Almaty (110,9) jáne Nur-Sultan (106,4) qalalary da turǵyn úı qurylysymen belsendi aınalysyp jatyr. Mınıstrlik turǵyn úı qurylysyna salynǵan ınvestısııanyń 231,2 mlrd teńgeni qurap otyrǵanyn málimdedi. Bul byltyrmen salystyrǵanda 36,5 paıyzǵa kóp.
Qazaqstan bıyl 17 mln sharshy metr turǵyn úı salýdy josparlap otyr. Aqpannyń sońynda ótken Úkimet otyrysynda Premer-Mınıstr Asqar Mamın Elbasynyń 2030 jylǵa qaraı baspanamen qamtamasyz etýdi 1 adamǵa 30 sharshy metrge deıin jetkizý týraly tapsyrmasyn oryndaý kerek ekenin eske salǵan. «Bes jylda 100 mln sharshy metr úı salyp, 1 mln-ǵa jýyq otbasyn baspanamen qamtımyz» degen edi Úkimet basshysy.
Indýstrııa jáne ınfraqurylymdyq damý mınıstri Beıbit Atamqulovtyń aıtýynsha, 2025 jylǵa deıin 100 mln sharshy metrden astam turǵyn úı salý – otandyq qurylys materıaldary naryǵyn damytýǵa da septigin tıgizedi.
– Qazirgi kezde otandyq óndirýshiler 10 taýar pozısııasy boıynsha ishki naryqtyń qajettiligin ótep otyr. 11 pozısııa boıynsha kásiporyndar 50 paıyzdy qamtysa, lınoleým, túsqaǵaz, sanfaıans sekildi 3 pozısııa boıynsha ishki naryq óndirisi bolmaı tur. Ishki naryqty tolyqtaı otandyq qurylys materıaldarymen qamtý úshin qazir sheteldik transulttyq kompanııalarmen Qazaqstanda ımportty almastyratyn óndirister qurý máselesin pysyqtap jatyrmyz, – deıdi mınıstr.
Memlekettiń josparlaýynsha, 2025 jylǵa taman «Nurly jer» baǵdarlamasy aıasynda barlyq qarjylandyrý kózi esebinen turǵyn úıdi paıdalanýǵa berýdiń jyldyq kóleminiń ulǵaıýy – 20,7 mln sharshy metrge jetýi tıis. Sondaı-aq aldaǵy bes jylda turǵyn úımen qamtý kólemi – bir adamǵa 26 sharshy metrden tıip, halyqtyń sýmen jabdyqtaý qyzmetine qoljetimdiligi 100 paıyzǵa jetýi qajet.