Aqparat jáne qoǵamdyq damý mınıstrligi bıyl elimizdiń 17 óńirinde, sonyń ishinde 14 oblys pen Nur-Sultan, Almaty jáne Shymkent qalalarynda memleket jáne úkimettik emes uıymdardyń ózara is-qımyly baǵytyndaǵy ózekti suraqtar boıynsha qoǵamdyq tyńdalym ótkizdi, dep habarlaıdy Egemen.kz
2021 jyldyń 3 aqpany men 17 naýryzy aralyǵynda «Mınıstrlik kúni» aıasynda 700-den astam adamnyń, onyń ishinde 300-den astam ÚEU ókilderiniń qatysýymen úkimettik emes uıymdardy memlekettik qarjylandyrý tetikterine arnalǵan 16 onlaın strategııalyq sessııa ótkizildi.
Sessııa barysynda vedomstvo ókilderi memlekettik áleýmettik tapsyrysty jáne ÚEU úshin qarjylandyrýdy jetildirý boıynsha júrgizilip jatqan jumystar men qoldanystaǵy tetikter týraly jiti túsindirdi.
Odan ózge, mınıstrlik strategııalyq sessııalarynyń arqasynda ár óńirde ÚEU men jergilikti atqarýshy organdardyń ókilderi ÚEU memlekettik qarjylyq qoldaý kórsetýdiń qoldanystaǵy tetikteri boıynsha problemalyq máseleler blogyn belgiledi.
Atap aıtqanda, memlekettik áleýmettik tapsyrysqa dempıngti joıý, ÚEU memlekettik áleýmettik tapsyrys boıynsha konkýrstarǵa qatysýdaǵy óńirlik shekteýlerdi belgileý, granttardyń salalyq qaǵıdatyn keńeıtý, halyqtyń qajettilikterin baǵalaýdy eskere otyryp, memlekettik áleýmettik tapsyrys taqyryptaryn qalyptastyrý jáne taǵy basqa suraqtar kóterildi.
Atalǵan máselelerdi sheship, usynystardy ázirleý boıynsha mınıstrlik azamattyq qoǵam salasyndaǵy sarapshylardyń jáne ÚEU ókilderiniń qatysýymen jumys tobyn qurdy.
Buǵan qosa, ÚEU memlekettik qoldaý tetikterin retteıtin normatıvtik aktilerdi jetildirý bóligi boıynsha da jumys júrgizilip jatyr. Sondyqtan memlekettik áleýmettik tapsyrysty qalyptastyrý, iske asyrý monıtorıngine jáne nátıjelerin baǵalaý qaǵıdalaryna, Memlekettik áleýmettik tapsyrys standarttaryna ózgerister engiziledi.
Sondaı-aq Qarjy mınıstrligimen birlesip Memlekettik satyp alýdy júzege asyrý qaǵıdalaryna ózgerister engizý boıynsha jumystar iske asyrylyp jatyr.
Búgingi tańda zańnamany jetildirý jáne Azamattyq bastamalardy qoldaý ortalyǵynyń ishki reglamentterin qaıta qaraý sheńberinde granttyq qoldaý júıesin qaıta jetildiriledi.
Vedomstvoǵa baǵynysty Azamattyq qoǵam isteri komıteti óńirlik qoǵamdastyq ókilderinen syndarly usynystardy jınady. Joǵaryda atalǵan usynystar qorytylyp, Mınıstrliktiń aldaǵy jumysynda eskeriletin bolady.