«DARA» JQ «Samruk-Kazyna Trust» Áleýmettik jobalardy damytý qorynyń qoldaýymen iske asyratyn «Ár alýan – biraq teń» jobasy aıasynda Qordaı kentindegi túzetý kabınetiniń fılıaldary Jambyl oblysynyń Masanshy jáne Sortóbe aýyldarynda ashyldy. Al Qordaı aýdanynyń ózinde Resýrstyq ortalyq óz jumysyn bastady. Budan basqa 15 jyldan beri jumys jasaıtyn Qordaı túzetý kabınetinde jóndeý jumystary júrgizilip, qajetti jabdyqtarmen tolyq jabdyqtaldy, dep habarlaıdy Egemen.kz.
Shara Prezıdent Qasym-Jomart Toqaevtyń bastamasymen uıymdastyrylǵan «Igi ister marafony» aıasynda ótti.
Jambyl oblysy bilim basqarmasynyń málimetinshe, Qordaı aýdanynda erekshe bilim alýǵa qajettiligi bar 910 bala turady, onyń ishinde 403-inde múgedektik bar.
«Mamandardyń ýaqytyly jáne bilikti kómegi «erekshe» balanyń ómirin jaqsartyp, onyń laıyqty jáne tabysty bolashaqqa qadam basýyna múmkindik beredi. Bilim alýynda erekshe qajettilikterdi talap etetin balalar men olardyń otbasylaryna kerekti qoldaýdy Qordaı aýylyndaǵy PPTK kórsetedi. Búgin Masanshy men Sortóbe balalaryna óz aýyldarynan shyqpaı-aq kómek alýǵa múmkindik beretin taǵy eki fılıal ashyldy. Osy jumys istep turǵan aýdandyq PPTK damytý jobasy aýyldyq jerlerde turatyn EBQ bar balalarǵa qyzmet kórsetý spektrin ilgeriletý jáne keńeıtý úshin úlgi bola alady», - dep atap ótti «DARA» qorynyń ókili Sáýle Beksultanova.
Psıhologııalyq-pedagogıkalyq túzetý kabıneti - bul kez kelgen erekshe bala jáne onyń otbasy defektolog, psıholog, logoped, sýrdopedagog, tıflopedagog, EDSh nusqaýshysy, mýzykalyq yrǵaq pedagogy sııaqty mamandar komandasynyń keshendi bilikti kómegin ala alatyn mekeme. Jyl saıyn PPTK, fılıaldardy qosa alǵanda, damýynda túrli aýytqýlary bar 120-dan astam balaǵa tegin qyzmet kórsete alady.
«PPTK jáne basqa da arnaıy bilim berý uıymdarynyń jelisin keńeıtýdiń arqasynda erekshe bilim berý qajettilikteri bar balalar óz qurdastarymen birge jalpy bilim beretin mektepte oqı alady. «Samuryq-Qazyna» AQ kompanııalar tobynyń qoldaýymen búkil Qazaqstan boıynsha 15 túzetý kabıneti jáne 16 resýrstyq ortalyq ashyldy», - deıdi Qordaı aýdandyq poshta baılanysy torabynyń bastyǵy Aqjol Kárimov.
Resýrstyq ortalyq - bul erekshe balalarmen jumys isteıtin mamandar men qarapaıym muǵalimderdiń mektep keńistigi jáne yntymaqtastyq aımaǵy. Resýrstyq ortalyqtyń qoldaýymen mektepte oqýda erekshe bilim berý qajettilikteri bar balalardy jalpy bilim beretin mektepterge tolyq jáne tıimdi engizý, damýynda aýytqýlary bar balalarmen jumys isteıtin pedagogtarǵa jáne olardyń ata-analaryna ǵylymı-ádistemelik qyzmetter keshenin kórsetý úshin qajetti jaǵdaılar jasalady.