Búgin Almatynyń jedel járdem kóliginde sábı dúnıege keldi. Tańǵy 4:33 shamasynda jedel járdem kómegine júgingen áıeldiń tolǵaǵy údep, bosanýǵa daıyndala bastaǵan. Pasıentti jedel túrde Perınataldyq ortalyqqa jetkizý kerek bolsa da, jaryq dúnıege asyqqan náresteniń óz jospary bar eken. Aıy-kúni jetip tolǵaǵy bastalǵan ana perzenthanaǵa jetpeı, feldsherlerdiń kómegimen jedel járdem kóliginde bosandy, dep habarlaıdy Egemen.kz.
«Teksergennen keıin áıeldiń júktiligi 40 apta ekeni anyqtaldy. Ony dereý perzenthanaǵa jetkizbek boldyq. Biraq pasıentti kólik ishinde bosandyrýǵa týra keldi. Kómekshim Eńlik anaǵa psıhologııalyq qoldaý kórsetti. Al men ony bosandyryp, balanyń kindigin kestim. Sóıtip ana men balany aman-esen perzenthanaǵa jetkizdik», deıdi almatylyq jedel járdem qyzmeti №10 qosalqy stansııasynyń feldsheri Adyljan Maqsutov.
Jedel járdem qyzmetiniń mamandary mindetterin zor jaýapkershilikpen atqarǵanynyń arqasynda dúnıege salmaǵy 3300 gr, boıy 54 sm qyz bala keldi. Kólikte dúnıege kelgen sábı otbasyndaǵy besinshi bala.
«Eki jyldyq tájirıbemizde mundaı oqıǵa birinshi ret boldy. Árıne, basynda qalaı bolady eken dep alańdadyq. Biraq bar bilimimiz ben tájirıbemizdiń arqasynda anany da, balany da aman-esen jetkizdik», deıdi feldsher Eńlik Bolatbekqyzy.
Jedel járdem qyzmeti úıde bosaný jaǵdaılaryna jıi tap bolatynyn atap ótý kerek. Aptasyna bir ana feldsherdiń kómegimen sábıin dúnıege din aman ákeledi. Alaıda jedel járdem qyzmetin tyǵyryqqa tiremeı, júkti áıelder ýaqytyly aýrýhana qyzmetine júgingeni abzal.
«Jedel járdem qyzmetindegi barlyq maman bilikti. Kez kelgen jaǵdaıda jedel medısınalyq kómek kórsetýge daıyn. Dese de turǵyndar óz densaýlyǵyna salǵyrt qaramaǵan jón. Ásirese júktilik kezinde», dep atap ótti Jedel járdem qyzmeti dırektorynyń mindetin atqarýshy Parhat Nadyrov.