Qorǵanys vedomstvosynyń basshysy Atyraý garnızonyna jasaǵan jumys sapary aıasynda «Batys» óńirlik qolbasshylyǵynyń áskerı bólimderi men Qorǵanys isteri jónindegi departamentine baryp qaıtty, dep habarlaıdy Egemen.kz atalǵan mınıstrliktiń baspasóz qyzmetine silteme jasap.
Qorǵanys mınıstri «Batys» óńirlik qolbasshylyǵynda komandalyq pýnkt qyzmetiniń uıymdastyrylý barysyn, baǵynysty áskerlerge jaýyngerlik basqarý dabylyn habarlaý men jetkizý tártibin tekserdi.
General-leıtenant Nurlan Ermekbaev Atyraý garnızonynyń áskerı bólimderinde áskerı tehnıkalardyń saqtalýy, olarǵa kórsetiletin qyzmet pen jóndeý tártibimen tanysty. Oǵan tehnıkalyq qyzmet kórsetýdiń barlyq túrlerin júrgizýge jáne toraptar men agregattardy aýystyrý arqyly, áskerı kólikterge jóndeýge múmkindik beretin tehnıkalyq qyzmetter men jóndeý pýnktiniń jumysy, sondaı-aq tehnıkany udaıy jaýyngerlik ázirlikte ustaý úshin akkýmýlıator batareıalaryn shaǵyn toqtarmen qaıta qýattaýdyń qoldanystaǵy júıesi kórsetildi.
Atyraý oblysy qorǵanys isteri jónindegi departamentiniń jınaý pýnktinde qorǵanys vedomstvosynyń basshysyna áskerge shaqyrý naýqanynyń barysy, áskerı bólimderdi jasaqtaý kezinde psıhologııalyq jáne medısınalyq irikteýdiń qazirgi erekshelikteri jóninde baıandaldy.
Qorǵanys mınıstri koronavırýs pandemııasyna baılanysty sanıtarlyq-epıdemıologııalyq sharalar men shekteýlerdi saqtaýdyń barlyq sharalaryn júrgizýge nusqaý berdi.