«Nurly jer» memlekettik baǵdarlamasy aıasynda kópbalaly jáne jalǵyzbasty analarǵa baspana kiltteri tabystaldy, dep habarlaıdy Egemen.kz qala ákimdiginiń resmı saıtyna silteme jasap.
Atalǵan sharada elorda ákiminiń orynbasary Nurlan Nurkenov pen «Otbasy bank» AQ Nur-Sultan qalasy boıynsha ortalyq fılıalynyń dırektory Jansultan Mataev qatysyp, úıli bolǵan turǵyndarǵa páter kiltterin tabystady.
«Nur-Sultan qalasynyń ákimi Altaı Kólginovtiń atynan sizderdi shyn júrekten quttyqtaımyn. Osy úı barshaǵyńyzǵa berekeli jáne qutty bolsyn. Úı ishi búldirshinderdiń syńǵyrlaǵan kúlkisi men baqytqa toly bolsyn!» dedi Nurlan Nurkenov.
Budan soń, Jansultan Mataev 2020 jyldyń nátıjesi boıynsha 2 500 adam memlekettik baǵdarlama aıasynda «Otbasy bank» arqyly jeńildetilgen nesıemen úı alǵanyn aıtty.
«Úıge muqtaj azamattardy úımen qamtamasyz etý boıynsha orasan jumys atqarylyp jatyr. Bıyl sol jumystar jalǵasyn tabýda. Sonymen qatar 8 myńǵa jýyq páter beriledi. Búgingi alǵan páterlerińiz qutty bolsyn! «Syrty malǵa, ishi janǵa tolsyn» degen qazaqta jaqsy sóz bar, sol qýanyshqa barlyǵymyz birge jete bereıik!» dedi ol.
Is-shara sońynda páter alǵan qala turǵyndary qýanyshtaryn bildirip, izgi tilekterin joldady.
«Osy úıdi alǵanyma qýanyshtymyn. Búginge deıin páter jaldap turdyq. Jalǵyzbasty ana bolǵandyqtan bul kúnge jetýim arman bolatyn. 2015 jyldan bastap kezekke turdym. Mine, búgin tóbem kókke jetip, jaqsy kóńil-kúıde turmyn», dedi Sánııa Jappasbaeva.