Túrkistan oblysynda tuńǵysh ret áıel adam qala tizginin qolyna aldy. QR Prezıdenti Ákimshiliginiń kelisimimen, Arys qalalyq máslıhaty depýtattarynyń qoldaýymen, Arys qalasynyń ákimi bolyp Gúljan Mamytqyzy Qurmanbekova taǵaıyndaldy, dep habarlaıdy Egemen.kz.
Jańa ákimdi qala aktıvine arnaıy tanystyrǵan О́mirzaq Estaıuly onyń aldaǵy jumysyna sáttilik tileı otyryp, abyroıly eńbek etetinine senim bildirdi.
Oblys ákimi Arys qalasynyń jańa basshysynyń aldyna óńirdiń áleýmettik-ekonomıkalyq damýy, qoǵamdaǵy birlik pen kelisimdi nyǵaıtý boıynsha birqatar mindetter júktep otyr.
«Arys - óte mańyzdy aýmaq. Qalada jasalatyn jumystar jetkilikti. Shaǵyn jáne orta bıznes salasyn, aýyl sharýashylyǵy salasyn damytý kerek. Eń bastysy bıznesti jandandyryp, ınvestısııa tartý kerek. Ol úshin barlyq múmkindikter bar. Gúljan Mamytqyzy óte tájirıbeli. Bıýdjet, qarjy, áleýmettik salalaryndy jetik meńgergen. О́zimniń keńesshim bolǵan. Tájirıbesi mol, eńbekqor azamat. Alda atqarylar ister kóp», dedi oblys ákimi.
Arys qalasynyń jańa ákimi Gúljan Qurmanbekova ózine artylǵan senimdi aqtap, Arystyń damýy men órkendeýi jolynda bar kúsh-jigerin jumsaıtynyn jetkizdi.
Gúljan Qurmanbekova 1965 jyly Otyrar aýdanynda dúnıege kelgen. 1987 jyly Almaty halyq sharýashylyq ınstıtýtyn bitirdi. Eńbek jolyn Sháýildir jolaýshylar avtokóligi mekemesiniń kassıri bolyp bastaǵan.
1987 – 1992 jyldary Qyzylqum aýdandyq qarjy bóliminiń kiris esebiniń ınspektory, tekserýshi –ınspektory, aǵa ekonomısti qyzmetterin atqarǵan. 1992 – 2004 jyldary OQO qalalyq qarjy bóliminiń aǵa tekserýshi-ınspektory, bas ekonomıst, bas maman-bas ekonomısti.
2004 – 2005 jyldary – OQO bilim departamentiniń bas mamany, Shymkent qarjy bólimi meńgerýshisiniń orynbasary. 2007 – 2010 jyldary – Shymkent qalasynyń qarjy bóliminiń bastyǵy. 2010 – 2020 jyldary – Shymkent qalasynyń ekonomıka jáne qarjy bóliminiń bastyǵy, Shymkent qalasy ákiminiń orynbasary qyzmetin atqardy. 2020 jyldan beri Túrkistan oblysy ákiminiń ekonomıka, qarjy máseleleri boıynsha keńesshisi boldy.
«Qazaqstan Respýblıkasynyń Konstıtýsııasyna 10 jyl», «Qazaqstan Respýblıkasynyń Táýelsizdigine 25 jyl» mereıtoılyq medaldarymen, «Eren eńbegi úshin» medalimen marapattalǵan.