Nur-Sultan qalasynda memlekettik baǵdarlama boıynsha salynǵan záýlim úı shetinen úgilip jatyr, dep habarlaıdy Egemen.kz Astana telearnasyna silteme jasap.
Syrtqy kirpish qaptama týra jaıaý júrginshiler júretin jerge opyrylyp túsken. Endi turǵyndar podezden shyǵýǵa qorqady. Shendilerden kómek suraıdy.
«Bizdiń úı qulady, dál meniń kóz aldymda qulady. Biz buǵan nege tózýimiz kerek? Tótenshe jaǵdaıdan adamdar keldi, olar shashylǵan kirpishterdi jınap alyp, ketip qaldy. Endi biz osy buzylǵan úıde osylaı ómir súrýimiz kerek pe», deıdi Nur-Sultan qalasynyń turǵyny Málik.
Jalǵa alýshylardyń aıtýynsha, úı is júzinde jap-jańa. Ol toǵyz jyl buryn ǵana memlekettik baǵdarlama boıynsha salynǵan.
Alaıda keıingi jyldary máseleler arty-artynan týyndaı bastaǵan. Káriz qubyrlary shirigen, jańa ǵımarattardy mezgil-mezgil qar sýy alyp ketedi eken. Endi halyq «úıdiń syrtqy qaptamasy úgilip jatyr» dep shaǵymdanyp otyr.
«Tańǵy toǵyz kezi bolatyn. Qýanyshqa oraı, qaıta qazir balalar úıde, onlaın oqıdy, áıtpese bul aradan oqýshylar kóp júredi, óıtkeni ana arada 64 mektep bar. Barlyǵy osy jerden ótedi. Qaıta adam ólimi bolǵan joq. Sonda qandaı da bir jamandyqtyń oryn alǵanyn kútýimiz kerek pe, eń jamany sol, bılik tarapynan áreket joq, eshteńe bolmaǵandaı», deıdi Nur-Sultan qalasynyń turǵyny Abzal Asanov.
Almaty aýdanynyń ákimdigi tótenshe jaǵdaı bolǵan jerdi zerttedik deıdi. Alaıda, sarapshylar saraptama jasalmaıynsha, sheneýnikter máseleni joıa almaıdy. Alaıda ony turǵyn úı ıelerine óz qarajattary esebinen jasaý usynylyp otyr.
«Bul úıde paıdalaný merzimi sharttaǵy kezeńge jetpegendikten, bizge mundaı tehnıkalyq zertteý júrgizý qıyn. Sondyqtan, ony turǵyndar óz qarajaty esebinen jasaı alady. Ol úshin táýelsiz sarapshylardy tartý kerek», deıdi Almaty aýdany boıynsha turǵyn úı basqarmasy jáne turǵyn úı ınspeksııasy bóliminiń bastyǵy Rústem Ábdirashev.
Sheneýnikter mundaı saraptamany úıdiń salynǵany 10 jyldan astam ýaqyt bolǵanda ǵana jasaı alady. Sondyqtan turǵyndarǵa táýelsiz sarapshylardy jaldaýdan basqa amal joq sekildi. Al ol qymbatqa túsedi. Biraq osydan keıin de jańa ǵımaratty jóndeý múmkinkindigi arta ma, belgisiz. Ákimdiktegiler bul úı memlekettik menshikke jatpaıdy dep túsindirdi. Demek, páter ıeleri ony óz esebinen retke keltirýi kerek bolady.