2025 jyly doktoranttardyń shákirtaqysy 260 myń teńge bolady. Bul týraly Bilim jáne ǵylym mınıstri Ashat Aımaǵambetov Facebook paraqshasynda jazdy, dep habarlaıdy Egemen.kz.
«Doktoranttardyń stıpendııasy 80%-ǵa ulǵaıdy. Budan bylaı olardyń stıpendııasy jyl saıyn 15%-ǵa ósip otyrady jáne 2025 jylǵa qaraı 260 myń teńgeni quraıtyn bolady. Biz úshin magıstratýra men doktorantýraǵa túsý kezindegi ashyqtyq pen merıtokratııany arttyrý mańyzdy. Sondyqtan ótken jyly magıstratýraǵa túsý úshin emtıhandardy alǵash ret elektrondyq formatta ótkizdik. Bıyldan bastap doktorantýraǵa túsý emtıhandary da osyndaı formatta ótpek», dep jazdy mınıstr.
Sondaı-aq ol ǵylymı qoǵamdastyqpen ornatylǵan tyǵyz qarym-qatynastyń nátıjesinde dıssertasııalyq keńesterdiń jumysy boıynsha erejelerge ózgerister engizilgenin aıtty.
«Doktoranttar úshin dıssertasııany qorǵaý múmkindikteri keńeıtildi. Odan bólek ǵylymı jýrnaldardyń tizimin qalyptastyrý erejelerine de ózgerister engizildi. 2021 jyldan bastap biz myqty, bedeldi ǵylymı jýrnaldardy qoldaý jónindegi jobany iske asyrýdy bastaımyz», delingen jazbada.
Eske sala keteıik, Bilim jáne ǵylym mınıstri Ashat Aımaǵambetov otandyq ǵalymdardy kásibı merekelerimen quttyqtady.