Ońtústik Koreıada Educational Broadcast System atty bilim berý júıesine arnalǵan telearna bar eken. Ásili, el jastaryna ozyq bilimdi nasıhattap qana qoımaı, qorshaǵan orta týraly tanymdyq habarlar túsirýimen de aty ozyp turǵan kórinedi. Endi telearnanyń túsirilim toby Qazaqstanǵa kelip, tabıǵaty tamyljyǵan Tekeli qalasyn aralap júr, dep habarlaıdy Egemen.kz.
Elimizge arnaıy kelgen sheteldik telejýrnalısterdi Tekeli qalasynyń ákimi Batyr Moldahmetov qarsy alyp, óńir jaıynda maǵlumat berdi. Al koreı tilshileri qazaqtyń ulttyq salt-dástúrleri jaıynda arnaıy telebaǵdarlama túsirýge kelgenderin aıtyp, shaǵyn qaladaǵytýrızmdi órkendetý boıynsha atqarylyp jatqan jumystarmen tanysty.
Jalpy, EBS telarnasynyń jýrnalısteri Tekeleniń kórkem tabıǵatyn aralap, taý arasyndaǵy qalanyń kelisti kelbetin aıshyqtaıtyn beınebaıan túsirmek nıette eken.
- Sheteldik qonaqtar tirshiligimizben bite qaınasyp jatqan ulttyq erekshelikterimizge, salt-dástúrlerimizge, ulttyq óner men sportqa, ásirese, halqymyzdyń ata-babamyzdan jalǵasyp kele jatqan sharýashylyǵyna, saıatshylyq ónerine, atqa miný mádenıetine, sonymen birge, bala tárbıesine erekshe qyzyǵýshylyq tanytyp, besikke salý, tusaýkeser sekildi joralǵylarǵa, kókpar, aýdaryspaq, teńge ilý syndy ulttyq oıyndarǵa erekshe nazar aýdarmaq, deıdi Tekeli qalasynyń ákimi Batyr Moldahmetov.
Aıtpaqshy, koreı jýrnalısi Son Jýn HvannyńQazaqstan týraly arnaıy telehabar túsirýge nıeti bolǵanymen, ony dál osy Tekelide bastaıtynyn josparlamapty da.
- Tekeli qalasyn tańdaýymyzǵa osy qalanyń turǵyny Faızolla Búrkitbaı esimdi adamnyń áleýmettik jelilerge salǵan sýretteri túrtki boldy. Ol kisi saıatshy eken. Men avtordyń qus baptaý, at baptaý, saıatshylyq óneri jaıyndaǵy sýretteri men aqparattaryn qyzyǵyp oqyp, zerttedim. Tekeleniń tabıǵı ereksheligine de sýretter arqyly qanyqtym. Bizdiń bul jobamyz Qazaqstannyń tabıǵaty jaıyndaǵy tanymdyq fılmge arqaý bolady, deıdi koreı jýrnalısi Son Jýn Hvan.