Túrkııanyń memlekettik «TRT» teleradıokompanııasy túsirgen «Ahmet Iаsaýı» telehıkaıasy qazaqstandyq kórermenderge usynylmaq. 26 bólimnen turatyn tarıhı telehıkaıa 19 sáýirden bastap «Qazaqstan» Ulttyq telearnasynan efırge shyǵady, dep habarlaıdy Egemen.kz.
Atalǵan kelisimge jýyrda QR Aqparat jáne qoǵamdyq damý mınıstri Aıda Balaevanyń Túrkııa memleketine saparynda qol jetkizildi.
«Ahmet Iаsaýı» telehıkaıasy túrki álemine ortaq tulǵa, sopylyq poezııanyń negizin qalaýshy, Ortalyq Azııa mádenıetine jańasha betburys ákelgen fılosof Qoja Ahmet Iаsaýıdiń ǵıbratty ómiri men júrip ótken kúres jolyn baıandaıdy. Rejıseri - Dogan Ýmıt Karadja, prodıýseri - Iýsýf Esenkal. Joba tusaýkeseri «TRT1» jáne «Qazaqstan» arnalarynan sáýir aıyna josparlanǵan.
Búgingi kúni «Qazaqstan» telearnasynyń Kınokórsetilim jáne dýblıaj bóliminiń mamandary - aýdarmashylar Baıan Nuǵman, Dosym Zikirııa, Jannat Aldııarova, redaktor Naǵyz Qypshaqbaı, dýblıaj rejısseri Núrgúl Beketaeva, dýblıaj akterleri Islam Zeınollaev, Mıras Jaqypov, Aqmaral Abdrahmanova, Muratbek Beısembaev jobany aýdaryp, dybystaýda.
Telehıkaıa 19 sáýirden bastap dúısenbi-juma kúnderi 21:30-da efırge shyǵady.
Buǵan deıin «Qazaqstan» teleradıokorporasııasynyń «Abaı» telehıkaıasy túrik elinde kórsetiletinin habarlaǵan bolatynbyz. Osy saparda «TRT AVAZ» arnasy serıaldy túrik tiline aýdarý jumystaryn aıaqtaǵanyn málimdedi. Qazaqstandyq telehıkaıa túrkııalyq kórermenderge «TRT AVAZ» efırinen jaqyn kúnderi usynylady.