Qazaqstan avtobıznes qaýymdastyǵynyń (QABQ) derekteri boıynsha, 2021 jyldyń úsh aıynda el aýmaǵynda jalpy quny 140,4 mlrd teńgeden asatyn 19 848 birlik tehnıka shyǵarylǵan. Bul kórsetkishterdiń 66%-y «SaryarqaAvtoProm» zaýytyna tıesili.
Úsh aıdyń qorytyndysy boıynsha Qostanaı avtomobıl zaýyty 13 063 birlik tehnıka shyǵardy. Bul ótken jyldyń sáıkes kezeńimen salystyrǵanda 34,7% -ǵa artyq (9 694 birlik).
О́sim óńirde shyǵarylatyn Chevrolet avtomobılderine degen belsendi suranystyń nátıjesinde bolyp otyr. Bul kólikter búgingi tańda qazaqstandyq naryqtaǵy eń kóp suranysqa ıe avtomobılder tizimin bastap tur. Birinshi toqsanda osy brendtiń 10 153 birligi óndirildi.
«Biz únemi avtomobıl óndirisiniń deńgeıin kóterýge ǵana emes, sonymen birge jergiliktilendirý deńgeıiniń joǵarylaǵan zamanaýı ónimderin shyǵarýǵa da umtylamyz. Osy baǵyttardaǵy damý búginde Qazaqstan naryǵy týraly ǵana emes, eksport týraly da aıtýǵa múmkindik beredi. Sonymen, jyl basynan beri 2 myńǵa jýyq ónim shetelge jiberildi», dedi «SaryarqaAvtoProm» JShS dırektory Syrym Semeıbaev.
2020 jyly zaýyt ónimdiliktiń rekordtyq deńgeıine qol jetkizdi – 40 050 birlik (eldiń barlyq tehnıkasynyń 51,7%-y). Bıyl kásiporyn qoldanystaǵy Jac, Chevrolet, UAZ jáne MAN brendteriniń joǵary suranysyna ǵana emes, sonymen qatar jańalary iske qosýǵa súıene otyryp, osy kórsetkishterden asyp túsýdi josparlap otyr.
Sonymen qatar 2021 jylǵy naýryzda zaýyt KIA avtomobılderin shyǵarýdy bastady. О́tken aıda Qostanaıda «SaryarqaAvtoProm» men «AvtoVAZ» arasynda seriktestik týraly kelisimge qol qoıyldy.
Qazaqstannyń iri avtomobıl zaýytynyń bıylǵy josparlanyp otyrǵan kólemi otandyq óndirýshilerge jylyna 100 myń birlik tehnıka belgisine shyǵýǵa múmkindik beredi.