Nur-Sultan qalasynda joldyń ortasynda paıda bolǵan tesikke kólik túsip kete jazdady. Kólikti shyǵarýǵa jaqyn mańaıda bolǵan júrgizýshiler kómektesti. Mundaı vıdeo 18 sáýir kúni ınstagram jelisinde tarady, dep habarlaıdy Egemen.kz.
Elordada Sh.Ýálıhanov pen Ǵ.Qarash kósheleriniń qıylysynda jol tósemi buzylǵan.
— Jol tóseminiń isten shyǵýy merdiger uıymnyń tesý ádisimen dıametri 300 mm SDR 17 qubyryn tóseý kezinde jumys tehnologııasynyń saqtalmaýynan oryn aldy. Nátıjesinde nóserlik káriz kollektory sý astynda qalyp, jol tóseminiń shaǵyn ýchaskesinde shuńqyr paıda boldy, – dep habarlaǵan qalalyq ákimdiktiń baspasóz qyzmeti.
Qazir ýchaske qorshalyp, apatty kómý jumystary júrgizilýde. 19 sáýirde ákimdik, ShJQ «Elorda Eco System» MKK, sondaı-aq JP ÁPB basqarmalary jol tósemin qalpyna keltirý jumystaryn júrgizedi.
Joldy jóndeý jumystaryn durys atqarmaǵan merdiger uıym jaýapkershilikke tartylady.