Ekologııa, geologııa jáne tabıǵı resýrstar mınıstrligi janýarlardy qorǵaýshylarmen birlesip «Janýarlarǵa jaýapkershilikpen qaraý týraly» zań jobasyn ázirledi. Qazir qujat Parlament Májilisinde jáne ony bıyl shilde aıynda qabyldaý josparlanyp otyr, dep habarlaıdy Egemen.kz mınıstrliktiń baspasóz qyzmetine silteme jasap.
«Inucobo» janýarlardy qorǵaý qaýymdastyǵynyń basshysy Lılııa Sársenovanyń aıtýynsha, janýarlardy qorǵaý týraly zań jobasy barlyq basqa zań jobalaryn júıege biriktiretin biryńǵaı hab retinde mańyzdy.
Bul zań jobasyna ilespe zań jobalary qosa beriledi, olardyń sheńberinde qazir úlken jumys júrgizilýde. Búginde elimizde janýarlarǵa qatysty 300-den astam normatıvtik-quqyqtyq aktiler bar. Olardyń negizgi jáne biryńǵaı qaǵıdattaryn jazyp, júıelendirý qajet. Sondyqtan ázirlengen zań jobasynyń mańyzy zor», dep atap ótti qaýymdastyq basshysy mınıstrliktiń Facebook-tegi resmı paraqshasynda.
Lılııa Sársenova janýarlardy qorǵaý týraly zań jobasynda olarǵa adamgershilikpen jáne jaýapkershilikpen qaraýdyń mańyzdy prınsıpteri bar ekenin atap ótti.
«Zań jobasynda janýarlarǵa arnalǵan baspanalar uǵymy jazylǵan. Biz qylmystardyń aýyrlyǵy boıynsha ákimshilik jáne qylmystyq dep jeke-jeke bólinýin usynamyz. Mysaly, janýarlarǵa jaýapsyzdyq tanytqany úshin ákimshilik bap, haıýandyq áreketi úshin qylmystyq bap qoldanylý kerek», dep habarlady spıker.
Sonymen qatar, zań jobasy aıasynda jyljymaly haıýanattar baǵyna tolyq tyıym salý josparlanýda. Sarapshy atap ótkendeı, mundaı nysandarda kóbine janýarlar tıisti kútim jasalmaı, olar qıyn jaǵdaılarǵa ushyraıdy. Sondyqtan janýarlardy qorǵaýshylar mundaı jyljymaly haıýanattar baǵyna qarsy.
«Zań jobasynda janýarlarǵa qatal qarym-qatynasty tolyǵymen toqtatý týraly jazylǵan. Sondaı-aq, veterınarııaǵa qatysty normalar da qozǵaldy. Aýyrsynýdy basatyn dárilerdi, adamgershilik evtanazııany qoldaný týraly da aıtyldy. Munyń bári óte mańyzdy», dedi Lılııa Sársenova.