Bıyl jol-kólik oqıǵasynan qaza bolǵandar sany kóbeıgen. Bul týraly IIM Ákimshilik polısııa komıteti tóraǵasynyń orynbasary Serik Túsipov aıtty, dep habarlaıdy Egemen.kz.
«Bıylǵy qozǵalys jyldamdyǵynyń jańarýyn, jol-kólik ınfraqurylymyn damytý jónindegi sharalar jetkiliksizdigin eskersek, apat kórsetkishiniń óskeni baıqalady. 2021 jyldyń úsh aıynda apat sany 4 paıyzǵa (2 740-tan 2 621-ge deıin) jáne zardap shekkender sany 1 paıyzǵa (3 634-ten 3 605-ke deıin) tómendese, qaza bolǵandar sany 12 paıyzǵa (325-ten 363-ke deıin) kóbeıgen», dedi Serik Túsipov.
Sondaı-aq ol ótken jyly pandemııa kezindegi karantın sharalary, oblysaralyq tasymaldardy shekteýge baılanysty apat kórsetkishi tómendegenin málimdedi. Jol-kólik oqıǵasy - 19 paıyzǵa, qaza tapqandar - 17 paıyzǵa jáne jaralanǵandar - 20 paıyzǵa azaıǵan. Al eń joǵary kórsetkishter 2013 jyly tirkelgen. Ol kezde 23 359 jol apaty tirkelip, 3 myńnan asa adam qaza taýyp, 30 myńǵa jýyq adam jaraqat alǵan.
Onyń aıtýynsha, joldardaǵy ólim-jitim jol-kólik oqıǵasynyń úsh negizgi túriniń dınamıkasyna baılanysty. Bul jaıaý júrginshilerdi soǵý, aýdarylý jáne kólikterdiń betpe-bet soqtyǵysýy. Osy túrlerdegi ólim-jitim barlyq apatta qaza tapqandardyń 56 paıyzy bolǵan. «Olardyń aldyn alý úshin qorshaýlar qoıyp, retteletin jerústi jáne jerasty jaıaý júrginshiler ótkelderin ornatý kerek», dedi ol.