Ádilet vıse-mınıstri Azamat Ámirǵalıev Qazaqstanda notarıýstarda rastalǵan qujatqa QR-kod beriletinin málim etti, dep habarlaıdy Egemen.kz
«Bolashaqta notarıýstar qaǵaz muraǵatynan bas tartady. 2021 jyly 1 shildeden bastap jyljymaıtyn múlikpen jasalatyn mámilelerdi resimdeý úshin barlyq óńirge ortaq júıe engiziledi. Eger buryn bul mámileler ornalasqan jeri boıynsha notarıýsta kýálandyrylǵan bolsa, endi taraptar ornalasqan jerine qaramastan kez kelgen notarıýs qyzmetine júgine alady. Budan bólek árbir notarıýs qujatyna QR-kod beriledi. Ol biregeı jáne qujatty burmalaýdyń aldyn alady», dedi ol.
Sondaı-aq elektrondy qujattarǵa qaǵazǵa balama retinde teń quqyq beriledi.
«Bul azamattardyń ýaqytyn únemdeýge jáne qujatty poshta jáne kýrer arqyly jiberýden aýlaq bolýǵa múmkindik beredi», dedi Azamat Ámirǵalıev.
Aıta keterligi, quqyqtar men zańdy talaptardy toqtatýdy tirkeý bir jumys kúninde qaralady. Bul menshik ıelerine óz múlikterin tez arada ótkizýge múmkindik beredi.