Túrkistan oblysynda toıhana bıznesimen aınalasatyn kásipkerler arasynda karantın kezinde isterin jańa baǵytqa burǵandar qatary artýda, dep habarlaıdy Egemen.kz.
Mysaly, Saıram aýdanynda jergilikti kásipker О́mirhan Orazymbetovtiń bıznestegi baǵytyn ózgertýge pandemııa sebepshi boldy.
О́tken jyly toıhana salǵan kásipkerdiń ǵımaraty búkil álemdi jaılaǵan pandemııaǵa baılanysty jıyn-toı ótkizýge shekteýler qoıylǵan soń, bos turǵan-dy. Endi toıhana zaman talabyna saı sport kesheni retinde jasaqtalyp, turǵyndardyń ıgiligine qyzmet etýde. Qazir «Dostyq» sport kesheninde 200 bala sporttyń bes túri boıynsha tegin jattyǵady. Munda taekvondo, dzıýdo, sambo, karate jáne gımnastıka úıirmeleri jumys isteıdi. Segiz bilikti bapker balalardy sportqa baýlıdy. Ekinshi qabatynda eresekterge arnalǵan zal bar.
Saıram aýdanynyń sport bólimi mamandarynyń málimetinshe, salaýatty ómir saltyn ustanatyn aýyl jastary bos ýaqytyn osynda ótkizedi.