Almatydaǵy qarttar úıinde eki er adam koronavırýs juqtyryp qaıtys boldy. Taǵy bir áıel kisi juqpaly aýrýlar stasıonarynda jatyr, dep habarlaıdy Egemen.kz «Shańyraq» áleýmettik qyzmet ortalyǵyna silteme jasap.
Qaıtys bolǵandardyń biri 67 jasta bolǵan. Marqumnyń týysy Oljas Hamıtov mekeme qyzmetkerleriniń salǵyrttyǵyna narazy, sebebi aǵasynan koronavırýstyń belgileri anyqtalǵan kezde birden aýrýhanaǵa jetkizbegen.
«Sońǵy ret anammen sóıleskende ol kisi jótelip jatty. Biz nelikten dárigerge qaralmaıtynyn suraǵanda, mekeme qyzmetkerleri durys qaramaıtynyn aıtty. Sosyn 16 sáýirde aǵam bizge habarlasyp koronavırýs juqtyrǵanyn jetkizdi. 18 sáýirde onyń qaıtys bolǵanyn estidik.Nelikten olar ýaqytynda emdep, PTR-test almaǵan? Bul qyzmetkerlerdiń salǵyrttyǵy, mekemege tekseris júrgizý kerek», deıdi marqumnyń týysy Oljas Hamıtov.
Almaty qalalyq densaýlyq basqarmasynyń ókili er adam koronavırýs juqtyryp aýyr jaǵdaıda aýrýhanaǵa túskenin aıtady.
«Shańyraq» ortalyǵynyń dırektorynyń orynbasary Symbat Nábıevanyń sózinshe, Serik Hamıtov rasynda ótken jyldyń qazan aıynan beri qarttar úıinde turyp kelgen. Sondaı-aq er adamnyń kornavırýs juqtyryp, qaıtys bolǵanyn da rastady. Alaıda, marqumnyń sońǵy kúnderi qatty jótelgenin joqqa shyǵardy.
Eske sala keteıik, buǵan deıin qarttar úıiniń taǵy bir turǵyny koronavırýs ınfeksııasynan qaıtys bolǵan edi. Qazirgi tańda juqpaly aýrýlar stasıonarynda ınfeksııa juqtyrǵan «Shańyraq» ortalyǵynyń taǵy bir turǵyny jatyr.
Gaýhar QAPASh