Qazaqstannan Eýrazııalyq ekonomıkalyq odaq elderine tasymaldanatyn taýar kólemi 9 paıyzǵa ósken. Import 2 paıyzǵa qysqarǵan. 2021 jyldyń qańtar-aqpan aılarynda Qazaqstannyń EAEO elderimen taýar aınalymynyń quny 3 mlrd dollardy qurapty. Bul 2020 jyldyń tap osy kezeńimen salystyrǵanda 1,3 paıyzǵa joǵary.
Jalpy, eksport 9 paıyzǵa, aqshaǵa shaqqanda 892,6 mln dollarǵa ósse, ımport 1,7 paıyzǵa – 2,1 mlrd dollarǵa qysqarǵan. Odaq elderiniń ishinde Reseımen aradaǵy taýar aınalymy eń joǵary kórsetkishke ıe: 2,7 mlrd dollar. Odan keıingi orynda 112,4 mln dollar taýar aınalymy kórsetkishimen Belarýs tur. Qazaqstannyń Belarýs elimen saýda-sattyǵy byltyrmen salystyrǵanda 17 paıyzǵa ósken. Tıisinshe, Qyrǵyzstanmen aradaǵy taýar aınalymy 109,8 mln, Armenııamen taýar aınalymy 2,3 mln dollardy quraıdy.
Eksporttyń da basym bóligi Reseıge jóneltiledi: 795,9 mln dollar. 2020 jylmen salystyrǵanda 10,7 paıyz ósim baıqalady. Al ımport 1,9 mlrd dollardy quraıdy. Bul rette 2020 jyldyń qańtar-aqpanymen salystyrǵanda ımport kólemi 2,3 paıyzǵa azaıǵan. Belarýsqa eksport 15,1 mln dollardy qurasa, Qyrǵyzstanǵa jiberilgen ónim kólemi 80,3 mln dollar mólsherinde. Qazaqstannan Armenııaǵa 1,3 mln dollardyń ónimi jetkizilgen.
Qazaqstan Odaq elderine negizinen temir rýdasy men prokatty eksporttasa, bul elderden avtokólik, tabıǵı gaz, temir jáne bolat shybyqtary ımporttalǵan. Saýda jáne ıntegrasııa mınıstri Baqyt Sultanovtyń aıtýynsha, Reseıde ashylǵan Qazaqstannyń saýda ókildigi bıznes-kelisimsharttardy jolǵa qoıyp, otandyq ónimdi tasymaldaýǵa, satýǵa kómektesedi.
– О́tken jyly taýar aınalymynyń jalpy quldyraýyna qaramastan, Reseıge agroónerkásip ónimderiniń úlken jelisiniń eksportyn ulǵaıtýǵa múmkindik týdy. Negizgi ósim qazaqstandyq jetkizýshiler men reseılik saýda jelileriniń «toǵysýyna» baılanysty. Reseıdiń iri jelilerine tek 85 265 tonna kókónis pen jemis jetkizildi. Dál osy agroónerkásiptik keshen ónimi saýda jelileriniń suranysyndaǵy ımporttalatyn ónimniń barlyq kóleminiń 70 paıyzyn quraıtynyn naqtylaımyn. Men óz taýarlaryn Reseıge eksporttaýǵa múddeli barlyq qazaqstandyq taýar óndirýshilerdi bizdiń Máskeý nemese Qazan qalalaryndaǵy saýda ókildigi bólimshesimen baılanysýǵa shaqyramyn, – deıdi mınıstr.
Sońǵy ýaqytta EAEO aıasyndaǵy Qazaqstannyń róli týraly jıi sóz bolyp júr. Halqynyń kóptigi jáne ekonomıkalyq áleýetiniń beriktigine baılanysty Odaqtaǵy Reseıdiń úles salmaǵy bárinen joǵary bolyp turǵany belgili. Buǵan oraı B.Sultanov óz pikirin aıtady.
– Zamanaýı halyqaralyq ekonomıkada jekelegen elderdiń naryǵy úshin emes, jekelegen óńirlik saýda birlestikteriniń naryǵy úshin belsendi kúres júrip jatyr. Men osy salada áleýetti ınvestorlarmen jıi kezdesemin. Olardyń kóbi óz bıznesiniń tabystylyǵyn Qazaqstan naryǵyna baılanystyryp emes, Reseıge taýar eksporttaý turǵysynan qarastyryp baǵalaıdy. Kez kelgen ıntegrasııalyq birlestikte ekonomıkalyq lıderdiń bolatyny sózsiz. Ekonomıkalyq qýaty tómen el óz áleýetin ózinen de myqty seriktester esebinen kóterýge múmkindik alady. Máselen, Eýropalyq Odaqta 27 memleket bar. Árqaısysynyń ekonomıkalyq deńgeıi ártúrli. О́zara saýdanyń basym bóligi EO lıderi – Germanııaǵa tıesili. Búkil Shyǵys Eýropa soǵan umtylady. Birlesken jobalar, kooperasııa, bilim deńgeıin arttyrý, adamdar men kapıtaldyń erkin aınalymy arqyly tájirıbe jınap, deńgeı arttyrýǵa talpynady, – dep túsindirdi mınıstr.