Shyǵys Qazaqstanda jyl basynan beri oblysta 25 adam COVID-19 indetinen qaıtys boldy. Bul týraly óńir basshysy Danıal Ahmetov Instagram-daǵy paraqshasynda jazdy, dep habarlaıdy Egemen.kz
«Jyl basynan beri óńirde 25 adam COVID-19 indetinen qaıtys boldy. Onyń 22-si Semeıdegi ınfeksııalyq aýrýhanada tirkelgen. Soǵan baılanysty komıssııa atalǵan aýrýhanaǵa tekserý júrgizdi. ShQO Densaýlyq saqtaý basqarmasy basshysynyń aıtýynsha, bul aýrýhanada kemshilikter anyqtalǵan», dedi óńir basshysy.
О́kinishke qaraı, Densaýlyq saqtaý mınıstrliginiń COVID-19-dy emdeýge arnalǵan hattama tártibiniń tolyq saqtalmaýy baıqalǵan. Ekinshiden, densaýlyq pasporttaryndaǵy derekterdi eskere otyryp, qosymsha syrqattaryna qaraı naýqastardy emdeý, dıagnozyna túzetý engizý júrgizilmegen.
«Úshinshiden, gormondyq terapııany taǵaıyndaýda aýrýdyń bastalýy, zerthanalyq zertteýler men EKG nátıjeleri eskerilmeıdi. Tórtinshiden, aýrýhanaǵa jatqyzylǵan soń birinshi táýlik ishinde naýqastar KT tekserýden ótkizilmeıdi. Emdeý kompıýterlik zertteýler nátıjeleri eskerýsiz taǵaıyndalady. Besinshi, antıbıotıkterdiń, dıýretıkterdiń birneshe tobyn negizsiz taǵaıyndaýlar bolǵan. Demalys kúnderi áleýmettik jelidegi jeke paraqshama túsken Semeı turǵyndarynyń shaǵymdarynan qalada KT apparattarynyń da isten shyqqany belgili boldy. Tekserý nátıjesinde búgingi tańda alty apparattyń tek 2-eýi ǵana jumys istep turǵany anyqtalǵan. Osy faktini jasyrýdan basqa, jaǵdaıdyń shıelenisýi kezinde jaýapty tulǵalar tarapynan KT jumys isteıtin aýrýhanalarda apparattyń táýlik boıǵy jumysy uıymdastyrylmaǵan», dedi Danıal Ahmetov.
Danıal Ahmetovtiń aıtýynsha, medısınalyq sapa jáne baqylaý departamenti tarapynan da eshqandaı shara qabyldanbaǵan. Semeıde koronavırýs jaǵdaıynyń ýshyǵýyna jol berilgenine baılanysty atalmysh salaǵa jetekshilik etetin qala ákiminiń orynbasaryna, oblystyq Densaýlyq saqtaý basqarmasy basshysynyń Semeı boıynsha orynbasaryna, juqpaly aýrýlar aýrýhanasynyń bas dárigerine qatań sógis jarııalaý tapsyryldy.
«Semeıge oblys ákimi apparaty basshysynyń orynbasary Ilııas Muhamedjan bastaǵan jumys tobyn jiberdim. Olar qala «jasyl» aımaqqa shyqqanǵa deıin sol jerde jumys isteıdi. Árbir ólim-jitim jaǵdaıyn taǵy da egjeı-tegjeıli tekserip, isten shyqqan KT paıdalanýǵa berýde eń shuǵyl sharalardy qabyldaý mindetteldi», dedi oblys ákimi.