Qazaqstandyq Instagram-akkaýnttardyń birinde tótenshe jaǵdaı kezinde 42 500 teńge alǵan barlyq jumyssyzdar endi 20 000 teńgeni memleketke qaıtarýǵa mindetti ekendigi týraly jańalyq talqylanýda. Bul aqparatty Eńbek jáne halyqty áleýmettik qorǵaý mınıstrligi joqqa shyǵardy, dep habarlaıdy Egemen.kz stopfake.kz saıtyna silteme jasap.
42 500 teńge mólsherindegi áleýmettik tólem Memlekettik áleýmettik saqtandyrý qorynyń (MÁSQ) qarajaty esebinen tólendi. Ol karantındik shekteýler men tótenshe jaǵdaı rejımine baılanysty kirisinen aıyrylǵan jumys isteıtin azamattarǵa berildi.
«Eger azamat jumyssyz bolsa, onyń Qazaqstan Respýblıkasy aýmaǵynda barlyq jerde qyzmetke shekteýler engizilýine baılanysty tabysynan aıyrylýy múmkin emes. Tıisinshe, ol 42 500 teńge almaýǵa tıis jáne ózin-ózi jumyspen qamtýshy retinde tólem alýǵa ótinish bermeýi kerek edi, óıtkeni ol bul sanatqa jatpaıdy. Degenmen, MÁSQ 42 500 teńge alǵan jumyssyzdardan 20 000 teńge kólemindegi qarajatty qaıtarýdy talap etip jatpaǵanyn atap ótkenimiz jón», dep habarlady Eńbek jáne halyqty áleýmettik qorǵaý mınıstrliginen.
Qazaqstandyqtardy buryn alǵan áleýmettik tólemderdi qaıtarýǵa mindetteıdi degen habarlama shyndyqqa janaspaıdy.
Qaznet paıdalanýshylaryn áleýmettik tólemderdi mindetti túrde qaıtarý kerek dep buǵan deıin de qorqytqan bolatyn. Eńbek jáne halyqty áleýmettik qorǵaý mınıstrligi bul aqparattardy da joqqa shyǵardy.