Los-Andjeleste 93-shi «Oskar» syılyǵynyń ıegerleri anyqtaldy. Bıyl «Oskardyń» basty fılmi retinde Hloıa Chjaonyń «Kóshpendiler mekeni» (Nomadland) fılmi tańdalyp, birden úsh atalym boıynsha («Úzdik fılm», «Úzdik rejısser», «Úzdik aktrısa») júldege ıe boldy.
Al «Úzdik anımasııalyq fılm» nomınasııasy boıynsha Pixar-dyń «Jan» (Soul) mýltfılmi úzdik shyqty. Ol sondaı-aq «Úzdik mýzykasy» úshin de marapattaldy.
«Ekinshi plandaǵy úzdik akter» nomınasııasynyń jeńimpazy «Iýda men Qara Messııa» fılmindegi róli úshin 32 jastaǵy Danıel Kalýýıa atandy. Al 73 jastaǵy ońtústikkoreıalyq aktrısa Iýn En-Djýnǵa «Ekinshi plandaǵy úzdik áıel róli» marapaty buıyrdy.
«Úzdik shetel fılmi» nomınasııasyn «Oskar» Tomas Vınterbergtiń «Jappaı ishý» komedııalyq-dramalyq fılmi jeńip aldy. Al «Úzdik vızýaldy effektter» nomınasııasy boıynsha Krıstofer Nolannyń «Dovod» kınokartınasy marapattaldy. «Úzdik derekti fılm» jeńimpazy – Netflix Original-dyń «Meniń segizaıaqty muǵalimim» fılminiń rejısserleri Pıppa Erlıh pen Djeıms Rıd boldy. Emırald Fennell «Úzdik ssenarıı» syılyǵyn «Úmit qyzy» debıýt fılmi úshin aldy.
Sondaı-aq «Úzdik qysqa metrajdy fılm» – Trevon Frı men Martın Desmond Roýdyń «Eki beıtanys jan» atansa, «Mank» týyndysynyń avtorlary úzdik operatorlyq jumys jáne kórkemdik qoıylym nomınasııasy boıynsha «Oskar» jeńip aldy. Al «Úzdik saýndtrek» ánshi H.E.R.-diń «Iýda jáne Qara Messııa» fılmindegi Fight for You áni dep tanyldy.
Aıta keteıik, Netflix iri aǵyndyq qyzmeti nomınasııa sany jaǵynan alǵa ozyp, 16 sanatta 35 nomınasııaǵa qol jetkizdi. Nomınasııalar sany boıynsha ekinshi orynǵa Disney ortalyǵy shyqty. Onyń úlesinde 15 nomınasııa. Pandemııaǵa baılanysty jeńimpazdardy jarııalaý saltanatyna 170 adam qatysty.