Qaıǵyly oqıǵamen aıaqtalǵan jol apatynan keıin qyzmetinen ketken О́skemenniń burynǵy ákimi Qýat Tumabaev memlekettik qyzmetke oralyp, Saýda mınıstrligi departamentinde basshylyq qyzmetke taǵaıyndalǵan edi. Alaıda Nur Otan partııasy Qýat Tumabaevty qyzmetinen bosatýdy usynyp otyr, dep habarlaıdy Egemen.kz
Parlament Májilisiniń depýtaty, Nur Otan partııalyq baqylaý komıtetiniń tóraǵasy Artýr Platonov eks-ákimniń jańa laýazymǵa taǵaıyndalýy Nur Otan partııasynyń «Ar-namys» kodeksine qaıshy keletinin basa aıtty.
«Bul taǵaıyndaý otandyq BAQ-ta aralas ári narazy pikir týdyrdy. Osy oraıda Q.Tumabaevty jańa qyzmetke taǵaıyndaý Nur Otan partııasy múshesiniń saıası tuǵyrnamasy men etıka kodeksiniń qundylyqtaryna qaıshy keledi. Partııanyń bedelin túsirýge baqylaý jasaý jónindegi elordalyq komıssııanyń usynysy boıynsha Q.Tumabaev tizimnen shyǵaryldy», dep jazdy Artýr Platonov Facebook-tegi paraqshasynda.