Nur-Sultanda Qazaqstannyń Tuńǵysh Prezıdenti-Elbasy, QHA Tóraǵasy N.Á.Nazarbaevtyń tóraǵalyǵymen Qazaqstan halqy Assambleıasynyń XXIX sessııasy ótip jatyr, dep habarlaıdy Egemen.kz.
Qazaqstannyń Tuńǵysh Prezıdenti-Elbasy, QHA Tóraǵasy N.Á.Nazarbaev Qazaqstan halqy Assambleıasynyń XXIX sessııasy barysynda til máselesine toqtaldy.
«Til – barlyǵymyzdy biriktiredi. Bul álemniń barlyq elderindegi shynaıy prosess. Bizde de solaı. Búginde elimizde qazaq etnosy 70%-dy quraıdy. Qazaq tilin bilýge, túsinýge degen umtylys óte jaqsy. Biz til úırenemin degenderge kez kelgen jerde qoldaý kórsetýimiz kerek. Assambleıa bul jerde mańyzdy ról atqarady. Árbir oblystaǵy ár ǵımarat, ár mekemede bul prosess júrip te jatyr», dedi ol.
Elbasy birqatar jastyń Assambleıanyń arqasynda ómirge jańa joldama alǵanyn aıtty. Nursultan Nazarbaev olardyń memlekettik tildi úırenýine dál osy Assambleıa sebep bolǵanyn jetkizdi.
«Maksım Spotkaı, Irına Ten, Maksım Rojın, Natalıa Dementeva... Qazir olardyń barlyǵyn tizip shyǵý múmkin emes, bul azamattardyń barlyǵy búginde jaýapty qyzmet atqaryp keledi. Osy azamattardyń áleýmettik jelilerindegi jeke paraqshalaryna kirseńiz de, qazaq halqynyń olardy qalaı jaqsy kóretinin baıqaısyzdar», dedi Elbasy.