Elordada «GAZel» júrgizýshisi «Astana Opera» teatrynyń mańyndaǵy kópirde apatqa ushyrady, dep habarlaıdy Egemen.kz
Apat týraly áleýmettik jelilerdiń birinde jarııalandy.
«28 sáýirde saǵat 20:15-te «GAZ-3302-288» markaly avtokóliktiń 22 jastaǵy júrgizýshisi Qonaev kóshesimen Turan dańǵylyna qaraı bara jatyp, jol belgisin elemeı, kólik quralynyń ólshemderin eskermesten tonnel qabyrǵasynyń qaptama taqtasyn qaǵyp ketti. Apattan zardap shekkender joq», dep habarlady elordalyq polıseıler.
Júrgizýshige QR ÁQBtK-niń 610-baby boıynsha ákimshilik is qozǵaldy.
«Materıal boıynsha prosestik sheshimdi Nur-Sultan qalasynyń mamandandyrylǵan aýdanaralyq soty qabyldaıdy. Elordalyq polısııa departamenti júrgizýshilerge jol qozǵalysynyń barlyq belgisi men erejesin qatań saqtaýdy eskertedi », dedi vedomstvo ókilderi.
Aıta keteıik, bul kópirdiń astynda buǵan deıin de apattar bolǵan. О́tken jyldyń qazanynda júk kóligi jaıaý júrginshiler kópiriniń astyndaǵy jolǵa syımaı, kólikke zaqym keltirgen edi. Odan bólek ótken jyldyń 26-tamyzynda «Astana Opera» teatrynyń mańyndaǵy jaıaý júrginshiler kópirine jedel járdem kóligi soqtyǵysqan bolatyn.