Zańsyz ókimder qabyldap, talaptardy saqtamaýy, birinshiden aýyl ákimderi arasynda qarjylyq, quqyqtyq saýaty jetkiliksiz azamattar bar ekenin ańǵartady, dep habarlaıdy Egemen.kz.
Jýyrda Túrkistan oblysyndaǵy Ádep jónindegi keńestiń kezekti otyrysynda birqatar aýyl ákimderine qatysty másele qaraldy.
Hantaǵy aýyly ákimi apparatynyń bas mamany Memlekettik qyzmet isteri agenttiginiń Túrkistan oblysy boıynsha departamenti basshysy A.Shilmanovtyń qabyldaýynda bolyp, óz quqyqtarynyń buzylǵandyǵy týraly aryzdanǵan. Sol aryz boıynsha departament tarapynan jospardan tys tekserý jumystary júrgizilip, óz quzyretinde bolmasa da shtattyq qurylymdy negizsiz bekitken, qyzmetshilerdiń eńbek ótili durys eseptelmegen, qyzmettik tergep-tekserý zańnamaǵa sáıkes júrgizilmegeni syndy birqatar zań buzýshylyqtar anyqtalǵan. Tekserý qorytyndysymen nusqama engizilip, ákimniń 10 ókiminiń jáne tıisti komıssııanyń hattamasynyń kúshi joıylyp, memlekettik qyzmetshiniń quqyǵy qalpyna keltirildi. Ádep jónindegi keńes sheshimimen Hantaǵy aýylynyń ákimine «Qyzmetine tolyq sáıkes emestigi týraly eskertý» túrindegi jaza qoldaný usynyldy.
Dál osyndaı tártiptik jazany sheshimderdi daıyndaý men qabyldaý kezinde zańdy tulǵaǵa quqyqqa syıymsyz qoldaý kórsetkeni úshin Sozaq aýdany Jartytóbe aýyldyq okrýginiń ákimine de qoldaný usynyldy. Ákim kelisimshartta kórsetilgen jumystardyń tolyq oryndalmaǵanyna qaramastan, merdigerge qarjyny aýdarǵan. Al Jetisaı aýdanynyń turǵyn úı-kommýnaldyq sharýashylyq bóliminiń basshysy memlekettik satyp alý týraly shart boıynsha aqsha qarajatyn ıgerý men bólýdi toqtata turý jóninde sottyń uıǵarymyna qaramastan ónim berýshige memleket qarajatyn aýdarǵany anyqtalǵan. Atalǵan laýazymdy tulǵaǵa Ádep jónindegi keńes sheshimimen «qatań sógis» túrindegi jaza qoldaný usynyldy.