«Samuryq-Qazyna» UÁQ Qytaıdyń Sinopharm vaksınasyn satyp alýyna qatysty túsinikteme berdi, dep habarlaıdy Egemen.kz QazAqparatqa silteme jasap.
«Vaksına tańdaýǵa qatysty máseleni «Samuryq-Qazyna» ózi aıqyndamaıdy. Bul «SQ-Farmasııa» men Densaýlyq saqtaý mınıstrliginiń quzireti aıasyna kiredi. Iаǵnı, olar mundaı sheshimdi qajetti kólemde vaksınanyń bolýyna, logıstıka men temperatýra rejımine baılanysty qabyldaǵan sııaqty. «Samuryq-Qazyna» qory 1 mln doza satyp alýǵa tólem jasaıdy. Qazir olardy jetkizý bastaldy», dedi agenttik tilshisine «Samuryq-Qazyna» UÁQ Qoǵammen baılanys jáne marketıngtik kommýnıkasııalar departamentiniń dırektory Marat Muhamedsalımov.
Onyń atap ótýinshe, 1 mln doza vaksına satyp alýǵa 31,1 mln dollar qarjy jumsalǵan.
«Búgin vedomstvoaralyq komıssııa otyrysynda 120 myń doza Qazaqstan boıynsha «Samuryq-qazyna» kompanııalar tobynyń jumysshylaryna egiletindigi týraly sheshim qabyldandy. Iаǵnı, óndiristik kompanııalar men fılıaldarda eńbek etetin munaıshylar, energetıkter, poshta qyzmetkerleri, ushqyshtar, stıýardessalar alady. Al qalǵan 880 myń doza barlyq qazaqstandyqqa, nıet bildirgen adamdarǵa qoljetimdi. Bastapqyda bul vaksına «Samuryq-Qazyna» kompanııalar tobynyń jumysshylary úshin satyp alyndy degen aqparat taraǵan bolatyn. Ol jalǵan aqparat», dedi ol.
Aıta keteıik, buǵan deıin «SQ-Farmasııa» «Samuryq-Qazyna» Ulttyq ál-aýqat qory AQ ujymyn vaksınasııalaý úshin 1 000 000 doza mólsherinde koronavırýstyq ınfeksııaǵa qarsy Hayat-Vax (SARS-CoV-2 (Vero Cell) vaksınasynyń partııasyn satyp alǵan edi.
Qytaıdyń «Sinopharm» kompanııasy Birikken Arab Ámirlikterinde óndirgen Hayat-Vax (SARS-CoV-2 (Vero Cell) COVID-19 koronavırýstyq ınfeksııasyna qarsy vaksınasy +2 - +8 gradýsta saqtalady. 1 adamǵa vaksınanyń 2 dozasyn engizý usynylady, ekinshi doza birinshi ıneksııadan keıin 14 kúnnen soń júrgiziledi.