О́tken senbide Úndistanda 400 myńnan astam adam koronavırýs juqtyrǵany anyqtaldy. Buǵan deıin mundaı jaǵdaı álemniń eshbir memleketinde kezdespegen edi.
Osylaısha, pandemııa bastalǵaly beri Úndistandaǵy naýqastar sany 19 mıllıonnan asyp jyǵyldy. Aıta keterligi, onynshy kún qatarynan qaýipti derttiń tyrnaǵyna ilingender sany 300 myńnan asyp tústi.
Budan bólek senbide elde 4 myńǵa jýyq adam qaza tapsa, jalpy kóz jumǵandar sany 215 myńǵa jýyqtady.
Qazirge deıin Úndistanda 154 mıllıon adamǵa ǵana vaksına salynǵan. 27 mıllıon turǵyn ekpeniń ekinshi dozasyn alypty. Bul – jalpy halyqtyń 2,1 paıyzyn quraıdy. О́zderińizge málim, elde 1,3 mıllıard adam mekendeıdi.
Jalpy, el bıligi vaksına salýdy bıylǵy 16 qańtarda bastaǵan edi. О́tken aptadan bastap 18 jastan asqandardyń bárine ekpe ektirý mindetti bolmaq.
Delıde 19 sáýirde engizilgen lokdaýn taǵy da uzartyldy. Negizi alǵashqy karantındik sharalar 26 sáýirde aıaqtalýy tıis edi. Qala ákimshiligi epıdemııalyq ahýaldy eskere kele, lokdaýndy 10 mamyrǵa deıin uzartýǵa sheshim qabyldady.
Keı málimetterge súıensek, Úndistanda vaksına qory taýsyla bastaǵan. Osyǵan baılanysty, taıaýda el bıligi Reseıden Spýtnık V vaksınasynyń 150 myń dozasyn aldyrtty. Syrtqy ister mınıstrliginiń ókili Arındam Bagchıdiń aıtýynsha, aldaǵy ýaqytta Reseıden mıllıondaǵan doza vaksına ákelinbek.
«Jyǵylǵanǵa – judyryq» demekshi, ótken aptada koronavırýspen aýyrǵandar emdelip jatqan aýrýhanada órt shyǵyp, 18 adam otqa orandy.