1 mamyrdaǵy jaǵdaı boıynsha Qazaqstanda UOS jeńisine úles qosqan 665 UOS qatysýshylary men múgedekteri jáne 113,5 myń basqa sanattaǵy azamattar turady. Ortalyq kommýnıkasııalar qyzmetinde ótken brıfıng barysynda Eńbek jáne halyqty áleýmettik qorǵaý vıse-mınıstri Erlan Áýkenov osyndaı derekterdi keltirdi, dep habarlaıdy Egemen.kz.
Atap aıtqanda Qorshaýdaǵy Lenıngrad turǵyndary, konslagerlerdiń burynǵy kámeletke tolmaǵan tutqyndary, UOS qaıtys bolǵan múgedekterdiń áıelderi (kúıeýleri), soǵys ýaqytynda qaza tapqan jesirler, tyl eńbekkerleri jáne UOS qatysýshylary men múgedekterine teńestirilgen basqa da adamdar.
«Elimizdiń táýelsizdiginiń barlyq 30 jyly ishinde ardagerler men tyl eńbekkerlerine qamqorlyq kórsetý, olardyń ómir súrý sapasyn arttyrý – memlekettiń áleýmettik saıasatynyń basty basymdyqtarynyń biri. Qart adamdardy áleýmettik qorǵaý sharalary ortalyq jáne jergilikti deńgeılerde júzege asyrylady. Jyl saıyn zeınetaqy jáne ózge de áleýmettik tólemder kólemi ulǵaıýda. 2021 jylǵy 1 qańtardan bastap bazalyq zeınetaqy 5%-ǵa jáne yntymaqty zeınetaqy 7%-ǵa, áleýmettik tólemder 5%-ǵa arttyryldy. Qabyldanyp jatqan sharalar halyqaralyq praktıkada qoldanylyp júrgen joǵaltylǵan tabysty almastyrý standartyn (40%) arttyrýǵa múmkindik berdi, ol Qazaqstanda bazalyq jáne ortaq zeınetaqy tólemderi esebinen 49,9%-dy quraıdy», dep málimdedi Erlan Áýkenov.
Sondaı-aq ol ózge áleýmettik tólemderge qaramastan, azamattardyń 20 sanaty arnaýly memlekettik járdemaqy alatynyn jetkizdi. Zeınetaqyny qosa eseptegende, áleýmettik tólemderdiń ortasha jıyntyq mólsheri:
– UOS qatysýshylary úshin – 182 851 teńgeni;
– UOS múgedekteri úshin – 188 051 teńge;
– basqa memleketter aýmaǵyndaǵy soǵys ardagerlerine (Aýǵanstanda, Vetnamda, Aljırde, Mysyrda, Irakta jáne t. b.) – 198 801 teńge;
– UOS qatysýshylaryna teńestirilgen adamdar úshin – 154 638 teńge;
– UOS múgedekterine teńestirilgen adamdar úshin-119 562 teńge;
– UOS jyldaryndaǵy tyl eńbekkerlerine - 120 112 teńgeni quraıdy.