Turǵyndar sany jyl saıyn artyp, qanatyn keńge jaıa túsken Túpqaraǵan aýdanyna qarasty Aqshuqyr aýylyndaǵy turǵyn úıler men ártúrli maqsattaǵy ǵımarattar qatary 1 mamyr – Qazaqstan halqynyń birligi kúnine oraı jańa áleýmettik nysanmen tolyqty.
El táýelsizdiginiń 30 jyldyǵyn atap ótý aıasynda paıdalanýǵa berilgen kóp salaly «Súleımen» sport kesheni sońǵy úlgide salynǵan. Túpqaraǵan aýdanynda sporttyq qural-jabdyqtarmen tolyq qamtylǵan 14 ashyq sport alańy, 5 fýtbol alańy, 5 kóshe trenajeri, 4 jabyq sport kesheni bar. Bıyl onyń qatary taǵy úsh birdeı sport keshenimen tolyǵady. Aqshuqyrda sport nysandarynyń bireýi jergilikti bıýdjet qarajatyna salynady. Sondaı-aq Aqshuqyr aýylyndaǵy jańalyq bıyl atalǵan aýdannyń Baýtın jáne Qyzylózen aýyldarynda jalǵasyn taýyp, bul aýyldarda da sport keshenderi boı kótermek.
Keshe ǵana aýyl turǵyndary men qonaqtaryna, jalpy sport qumar qaýymǵa esigin aıqara ashqan zamanaýı «Súleımen» sport kesheninde 500 adam boks, gımnastıka, sýǵa júzý sııaqty sporttyń birneshe túrimen aınalysa alady. Sport kesheni jekpe-jek túrlerin damytýǵa kúsh salyp júrgen atymtaı azamat Ibragım Aqdrashevtyń demeýshiligimen salyndy.
Mańǵystaý oblysy