QR Táýelsizdiginiń 30 jyldyǵy qarsańynda Batys Qazaqstan oblysynyń «Jigit sultany – 2021» baıqaýy ótip, júzden júırik, myńnan tulpar jigitter eki kún boıy synǵa tústi dep habarlaıdy Egemen.kz.
Karantın talaptaryna sáıkes kórermensiz, onlaın ótken baıqaýǵa Batys Qazaqstan oblysynyń Aqjaıyq, Báıterek, Janaqala, Jánibek, Qaratóbe, Syrym, Terekti, Shyńǵyrlaý, Bórli aýdandarynan jáne Oral qalasynan 10 úmitker qatysty. Dem beretin jankúıer bolmaǵanymen, Batys Qazaqstan oblysy ákimdigi, oblystyq mádenıet, ishki saıasat, sport jáne dene shynyqtyrý basqarmalary, Oral qalasynyń ákimi, qalalyq mádenıet jáne tilderdi damytý bólimi, «Nur Otan» partııasy jáne oblystyq «Aqjaiyk» telearnasy jan-jaqty qoldaǵan is-shara joǵary deńgeıde ótti.
Baıqaýǵa qatysýshylar saıystyń «Qazaqtyń balasymyn tegi bútin» dep atalǵan alǵashqy kezeńinde ózin, ata-tegin, ósken jerin tanystyrsa, «Attyń dańqy jigit qolynda, jigit dańqy óz qolynda» synaǵynda aýdaryspaq, teńge ilý, jamby atý syndy ulttyq oıyndaryna qatysty. Úmitkerlerdiń ismerlik, sheberlik, qolónerlik qasıetterin kórsetken «Jigitter bar narqasqa...» synaǵy da tartysty boldy. Asa tartysty bul saıys Oral qalasynyń irgesindegi «SABA»etnokesheninde, «Oral» sport klýbynyń at sporty bóliminde ótti.
«Jigit sultany» saıysyna qazylyq etken Qazaqstan Respýblıkasy Mádenıet salasynyń úzdigi, Qurmanǵazy atyndaǵy Oral saz kolledjiniń dırektory, kúıshi Nurjan Sertekov baıqaýǵa qatysýshylardyń barlyǵy da úlken daıyndyqpen kelgenin aıtady. Jigitterdiń osaly joq. Mysaly Shyńǵyrlaý aýdanynan kelgen Maǵjan Jeńisov – Shyńǵyrlaý aýdandyq mádenıet, tilderdi damytý, dene shynyqtyrý jáne sport bólimi «Shyńǵyrlaý» sport klýby ádiskeri bolsa, jańaqalalyq Qolǵanat Serikov – Jańaqala aýdandyq «Jastar» sport klýbynyń ulttyq at sporty nusqaýshysy bolyp qyzmet etedi eken. Aqjaıyq aýdanynan kelgen Shapaǵat Naýryzov ta ońaı shaǵylatyn jańǵaq emes, Aqjaıyq aýdandyq balalar-jasóspirimder sport mektebiniń jattyqtyrýshysy bolyp shyqty. Kúsh pen eptilik syny olardyń oń jambasyna kelgenimen, ózge áriptesteri de qarap qalmady. Syrym aýdany Buldyrty aýyldyq mádenıet úıi ádiskeri Nurlybek Ýálıahmetov, Oral qalasyndaǵy «Alaý» balalar aýla klýbynyń úıirme jetekshisi Ergen Nurlan, Qaratóbe aýdandyq mádenı-demalys ortalyǵynyń hormeısteri Saqtaǵan Memleketov, Jánibek aýdany Jaqsybaı aýyly M.B.Yqsanov atyndaǵy mektep muǵalimi Ernar Erlanov, Bókeı orda aýdanyndaǵy Shońaı aýyldyq klýbynyń meńgerýshisi Raýan Qajyǵalıev, Bórli aýdandyq demalý ortalyǵynyń kópshilik is-sharalar rejısseri Erasyl Málik, týǵan jeri Báıterek aýdanynyń namysyn qorǵaǵan Oral gýmanıtarlyq-tehnıkalyq kolledjiniń stýdenti Raıymbek Sabyrǵalıev jeńisti qoldan bermeýge tyrysty.
Qazylar alqasynyń quramynda bolǵan Qazaqstan Respýblıkasy Mádenıet salasynyń úzdigi, akter, respýblıkalyq «Jigit sultany» baıqaýynyń laýreaty Musaǵalı Bektenov, Qazaqstan Respýblıkasynyń eńbek sińirgen sport sheberi, sambodan tórt dúrkin álem chempıony, BQO Ulttyq sport federasııasy qoǵamdyq birlestiginiń prezıdenti Erbolat Baıbatyrov, «Aǵaıyn»qazaq mádenı birlestiginiń tóraǵasy, Oral qalalyq máslıhatynyń depýtaty, halyqtyq Bıǵalıevtar otbasylyq ansambliniń múshesi Arman Bıǵalıev, HIV Halyqaralyq «Shabyt» shyǵarmashyl jastar festıvaliniń laýreaty, aımaqtyq, respýblıkalyq úkili dombyra baıqaýlarynyń laýreaty, Qurmanǵazy atyndaǵy saz mektebiniń oqytýshysy Aslan Serikbaev saıysqa barynsha ádil tórelik jasady.
Sonymen, eki kúnge sozylǵan saıystyń bas júldesin jańaqalalyq Qolǵanat Turarbekuly jeńip aldy. Oǵan 300 myń teńgelik sertıfıkatpen birge arnaıy daıyndalǵan «Jigit sultany – 2021» altyn beldigi tabys etildi.
Birinshi oryn – shyńǵyrlaýlyq Maǵjan Faızollaulyna, ekinshi júlde – báıterektik Raıymbek Esenkeldiulyna, úshinshi syılyq – Aqjaıyq aýdanynyń ókili Shapaǵat Bekbolatulyna buıyrdy.
Bórli aýdanynan kelgen Erasyl Erlanuly, jánibektik Ernar Baýyrjanuly, qaratóbelik Saqtaǵan Berikuly, terektilik Alpamys Ermekuly, Syrym aýdanynyń ókili Nurlybek Bekbolatuly, Oral qalasynan Ergen Nurlanuly – saıystyń dıplomanttary atandy.
Bir ereksheligi, júldegerlerge berilgen syılyq ta saıystyń ataýyna saı – túlki tymaq, er-turman, qamshy, dombyra syndy ulttyq buıymdar boldy.
- Bul baıqaý bizdiń jastarymyzdyń arasynda salaýatty ómir saltyn nasıhattap, ulttyq qundylyqtarǵa shaqyratyny sózsiz. Aq Jaıyqtyń jigitteri álemdik maıdandarda da atoı salsa deımiz. О́ńirimiz pandemııa qyspaǵynda turǵanyna qaramastan biz bul mańyzdy is-sharany óz deńgeıinde ótkizýge tyrystyq. Jigittiń sultany men syrttany kóp bolsyn! – deıdi Batys Qazaqstan oblysy ákiminiń orynbasary Baqytjan Narymbetov.