О́zbekstanda 10 mamyrdan bastap «Salaýatty ómir salty» jobasy aıasynda jaıaý júretin azamattarǵa aqsha tólene bastady, dep habarlaıdy Egemen.kz.
Jobaǵa tek О́zbekstan azamattary ǵana qatysa alady. Ol úshin elektrondy úkimet portalynda tirkelip, telefonǵa arnaıy qosymshany júktep alý kerek. Joba boıynsha jasy 18-den asqan ózbekstandyq 1 táýlikte 10 myń qadamnan artyq jaıaý júrse, onyń shotyna 125 teńge kóleminde aqsha túsip otyrady.
Al ár aıdyń qorytyndysy boıynsha eń kóp júrgen adam 12 myń men 40 myń teńge aralyǵynda tabys taba alady. Kimniń qansha qadam júrgenin qalaı anyqtaý keregin jergilikti bılik ázirge bilmeı otyr. Sondyqtan platforma 1 maýsymǵa deıin synaqtan ótedi. Keıin ádisi tabylǵannan soń tolyqqandy iske qosylady dep josparlanǵan.