«Aman-Saýlyq» qoǵamdyq qory COVID-19 pandemııasy kezeńinde Almaty qalasynyń turǵyndary men medısına qyzmetkerleriniń ótinishterin qabyldaý úshin táýlik boıy jumys isteıtin «shuǵyl jeli» telefonyn iske qosty, dep habarlaıdy Egemen.kz.
Sáýir aıynda jedel jelige COVID-19-dan qalaı jáne qaıda emdelýge bolatyndyǵy jáne vaksınasııalaýǵa qatysty suraqtarmen 700-den astam adam habarlassa, onyń 600-den astamy qala, 60-y Almaty oblysynyń, al qalǵany basqa óńirler turǵyndarynan túsken.
О́tinish bildirgenderdiń arasynda 137 adam vaksınasııamen baılanysty suraqtar qoıǵan. Aýrýhanaǵa jatqyzý, COVID-19-dy emdeý, onyń belgileri, aýyryp qalý kúdigi 234 adamdy alańdatqan. Adamdar aýrýhanaǵa jete almaıtyndyǵyna, týystarynyń qandaı aýrýhanaǵa túskenin bilmeıtindigine, koronavırýsqa kúdik sezingenine shaǵymdansa, seksennen astam telefon soǵýshyny emhanalarda nemese stasıonarda sapasyz medısınalyq qyzmet kórsetilgeni mazalaǵan.
«Kelip túsken qońyraýlardy taldaı otyryp, ótinishterdiń 63,5%-y koronavırýstyq ınfeksııany emdeý, vaksınasııa máselelerimen jáne stasıonarlarda emdelýge shaǵymdarmen baılanysty ekenin kórip otyrmyz. Adamdarda áli kúnge deıin koronavırýstyq ınfeksııa bolǵan jaǵdaıda ózin qalaı ustaý kerek, qaıda barý kerek, PTR testileýden ótý týraly jetkilikti aqparat joq. Osy problemalar men suraqtar blogyna vaksınasııa suraqtary da qosyldy. Jurtshylyqta vaksınalardyń tıimdiligi, vaksınalarǵa reaksııa týraly tolyq aqparat joq. Saýatty aqparattyq saıasat qurý máselesi áli de ózekti bolyp otyr», deıdi «Aman-saýlyq» QQ prezıdenti Baqyt Túmenova.
Osy jyldyń 1 naýryzynan bastap qosylǵan telefon jelisi táýlik boıy, demalyssyz jáne merekelersiz jumys isteıdi. Joba Soros - Qazaqstan qorynyń granty esebinen júzege asyrylýda. Naýqastar, sondaı-aq medısınalyq mekemelerdiń qyzmetkerleri medısınalyq kómek, dári-dármekpen qamtamasyz etý, konsýltasııalyq kómek jáne t. b. alýmen týyndaǵan problemalardy sheshý úshin shuǵyl jelige júgine alady. Táýlik boıy jumys isteıtin «shuǵyl jelige» +7 727 221 85 05 telefony arqyly habarlasýǵa bolady.