1 shildege deıin vaksınalaý pasporty «Ashyq» qosymshasynda kórsetiletin bolady. Vaksınanyń eki komponentin tolyq alǵan azamattardyń mártebesi jasyl túspen belgilenedi. Bul týraly kóliktegi sanıtarlyq-epıdemıologııalyq baqylaý departamentiniń basshysy Janar Orazalına málimdedi, dep habarlaıdy Egemen.kz.
Jalpy joba iske qosylǵannan bastap, «qyzyl mártebe» anyqtalǵan paıdalanýshylardyń sany 2 myńǵa jetti. Odan bólek «Ashyq» qosymshasymen jumys isteıtin kásipkerlik sýbektileriniń sany 5 myńnan asty.
«Barlyǵy zańǵa sáıkes bolady. Zań qaýlydan joǵary, eshkim jeke derekterdi paıdalanbaıdy. Derbes derekter sot sheshimi bolǵan jaǵdaıda ǵana usynylýy múmkin. Bul júıe zańǵa sáıkes jumys isteıdi. Qaýlyǵa sáıkes, derekterdi tek sanıtarlyq dárigerlerge beremiz. Qalǵanynyń bári derbes derekter týraly zańmen retteledi», dedi Sıfrlyq damý, ınnovasııalar jáne aeroǵarysh ónerkásibi vıse-mınıstri Áset Turysov.